美國民主黨聯邦參議員布克（Cory Booker）喺國會上演一場驚人嘅體力與意志力考驗，為抗議總統特朗普「違憲」，佢毅然喺參議院講足25小時5分鐘，打破美國國會史上最長單人發言紀錄。布克呢場歷時超過一日一夜嘅超長演說，冇得坐、唔准離場，甚至唔可以上洗手間，完全仿如一場政治苦行。

外媒形容，呢一幕不禁令人聯想起1939年荷里活經典電影《民主萬歲》（Mr. Smith Goes to Washington）入面，男主角喺國會孤身發聲嘅傳奇場景。

布克係3月31日晚上7點登台，直到翌日晚上8點05分先「交咪」。期間佢情緒高漲，語氣堅定，斥責特朗普削支政策粗暴無情，還令其顧問、同時為全球首富嘅馬斯克，可以喺無國會授權底下，大刀闊斧刪減多項聯邦補貼與民生計劃，形容呢啲行為係對民主制度嘅踐踏。

「呢一刻係道德抉擇嘅時刻，唔關左翼定右翼事，重點係分清乜嘢係對、乜嘢係錯。」布克講完呢句之後，終於講出：「主席女士，我讓出發言權。」布克今次打破嘅紀錄，原先由南卡羅來納州已故共和黨參議員塞蒙德（Strom Thurmond）保持，佢當年為阻撓「1957年民權法案」，曾發言24小時18分鐘。

現年55歲、來自紐澤西州嘅布克一向被視為民主黨內進步派代表人物。佢喺發言期間直指，特朗普咄咄逼人擴大行政權限，令本應三權分立嘅制度出現極大危機。佢表示：「唔同背景嘅美國人而家都喺捱緊唔必要嘅苦。美國嗰套獨特、珍貴、無可取代嘅制度，正喺遭受一啲魯莽嘅……我想講，甚至係違憲嘅干預、攻擊同破壞。」又話短短71日內，特朗普已對美國民眾嘅安全、經濟穩定同民主制度基石構成重大破壞。

雖然呢場發言唔屬於針對特定法案程序，但布克表示，希望透過呢種非常規方式，喚起社會大眾對特朗普政府「無視制度、破壞憲政」行為嘅警惕。佢喺結語中語帶希望地講，鼓勵民眾唔好因為政治現況而氣餒，「人民嘅力量比當權者更強大」亦不忘幽默一下，話：「我想稍微刷新紀錄，然後就要處理一下我感受到嘅生物緊急情況。」語畢後，全場一陣笑聲。《I》