位於美國南達科他州、聞名全球嘅拉什莫爾山（Mount Rushmore），目前雕咗四位美國歷任總統嘅巨型石像，可能好快就會迎來第五位主角——現任總統特朗普！

美國內政部長柏根（Doug Burgum）近日接受霍士新聞（Fox News）訪問，被主持人問道「內政部負責監督美國國家公園管理局，而國家公園管理局管理拉什莫爾山，很多人想知道，我哋會喺拉什莫爾山睇到特朗普總統嘅面嗎？」柏根隨即回應：「總統山絕對有位擺第5個雕像」。

而主持人唔係普通人，正正就係特朗普嘅第二個媳婦萊拉·特朗普（Lara Trump）。成段訪問安排得妥妥哋，氣氛熱烈，似足一場預演好晒嘅宣傳劇。柏根仲話2026年7月4日美國建國250周年當天，當地會有盛大慶典。

話說，將特朗普加到總統山唔係新鮮事，幾年前已經有人提過。特朗普本人亦對呢個地點情有獨鍾——2020年佢做緊第一任總統嗰陣，就曾經親身到拉什莫爾山參觀，仲喺山上最有可能雕第5個總統像嘅位置「打卡留念」，一副「呢個位我包咗」嘅姿態。

至於今次「雕像夢再起」嘅背景，係隨住特朗普再度入主白宮，一眾支持者士氣高漲，來自佛羅里達州嘅國會眾議員盧娜（Anna Paulina Luna）就話，特朗普應該要「留名千古」，將佢嘅頭像正式加入總統山。有份落力推波助瀾嘅，仲有「政府效率部」（DOGE）負責人、億萬富翁馬斯克，佢今年二月喺社交平台上發文，稱以呢種取得成就嘅速度，特朗普應該被加到總統山上去，「我想親手雕刻」。

講返個背景，所謂「總統山」其實係南達科他州布拉克山脈入面一個花崗岩山峰。1885年，當時一位紐約律師查爾斯·E·拉什莫爾（Charles E. Rushmore）嚟勘探礦產，之後將座山改名做「拉什莫爾山」。後來，當地政府為吸引旅客，提出喺山上雕刻美國偉人頭像嘅構思，雖然當年喺國會同時任總統卡爾文·柯立芝之間爭議連連，但最終項目都獲批，1927年正式動工，到1941年完工。

拉什莫爾山國家紀念公園，又稱美國總統山，公園內有四座高達 60 英尺嘅美國著名前總統頭像，包括 華盛頓、 傑佛遜、老羅斯福同林肯。如果特朗普成功「上山」，總統山就正式「封頂」，冇晒位置加第六人。《I》