美國司法部日前喺聯邦法院遞交文件，罕有地承認政府執行驅逐令時出現「行政疏失」，錯誤地將一名薩爾瓦多男子遣返當地，仲直接送入當地惡名昭彰嘅監獄。事件引起民主黨議員、人權團體甚至部分保守派盟友猛烈抨擊，質疑特朗普政府嘅強硬移民政策草率成災。

涉事男子阿布雷戈賈西亞（Kilmar Abrego Garcia）喺未被正式定罪情況下，被美國當局視為幫派成員處理，3月與數百名疑似黑幫分子一同被遣送返薩爾瓦多。該國監獄環境惡劣，曾多次被國際特赦組織批評，坊間稱之為「人間煉獄」。

根據法院文件，阿布雷戈賈西亞早於2019年被美方指控為MS-13幫派成員，但一直未有被定罪。更有聯邦法官曾裁定，佢若被遣返回薩爾瓦多將面臨生命威脅，依法獲得免遣返保障。點知，今年3月，佢竟然無預警被列入驅逐名單，同其他重案犯一齊遣返。政府律師團隊昨日提交文件，承認整宗事件係因「行政程序錯誤」所致。不過，政府同時強調，因為阿布雷戈賈西亞已經唔喺美國境內，所以法院無權將佢帶返美國。

事件曝光後，美國白宮拒絕承認處理失當。發言人李威特（Karoline Leavitt）喺記者會上語氣強硬，聲稱政府掌握未公開證據，證實阿布雷戈賈西亞「實際上係殘暴嘅MS-13幫派領袖」，又話「外國恐怖分子在美國不再享有法律保障，總統有權限將這些罪大惡極的人驅逐出美國社會。」

特朗普自第二任期上任以來，火速推進「移民清洗」政策，履行其競選承諾。白宮聲稱，此舉係為咗「剷除幫派毒瘤，保障美國人安全」。但實際上，大量與幫派關係薄弱、甚至根本冇任何犯罪記錄嘅移民都被一刀切列入驅逐名單。唔少個案根本未經審慎審查程序就匆匆遣返，甚至被送往原居地監禁或遭受酷刑。

事件引發民主黨多名參議員炮轟特朗普政府漠視人權，亦有共和黨內部人士出現分歧。一向政治立場偏右、深具影響力嘅Podcast主持人喬羅根（Joe Rogan）都公開批評做法過火。《I》