立法會教育事務委員會喺3月31日開會，聚焦討論「以英語為母語的英語教師計劃」（俗稱NET計劃），期間多名議員就外籍教師質素、文化背景同政治意識等問題表達關注。當中有議員擔心，某啲來自美國嘅老師喺課堂上可能引用「美國打壓我哋國家」嘅教材作教學例子，質疑呢啲教師應該接受《國安法》同《基本法》考核。

教育局局長蔡若蓮喺會上回應時強調，雖然現時NET教師未被要求通過《基本法》或《國安法》測試，但佢哋喺學校內都係教職員一份子，會參與早會、會議等活動，對香港憲制架構應該有基本了解。而且，佢哋通常唔會獨立設計教材，所有教材都會由英文科組把關，同本地老師協作完成，確保內容合適。

蔡若蓮又解釋，NET計劃原意係為咗提升學校嘅英語語境，增加學生接觸同練習英語嘅機會，所以當初設計冇規定外籍教師要接受有關考核。不過，教育局一直重視課堂內容質素同專業操守，亦會持續檢視有關安排。

經民聯嘅選委會議員陸瀚民就明言關注外籍老師對香港法例同國情認識是否足夠，佢舉例話：「如果有一個美國籍英語老師，喺教書時引用咗啲話美國打壓中國嘅教材嚟教，咁就好明顯唔理想啦！」佢建議教育局應考慮比照本地教師標準，要求NET都要通過相關政治認知考核。

新民黨主席葉劉淑儀議員亦加入討論，質疑NET計劃實際成效。佢直言：「我細個一直都係本地大學畢業嘅老師教英文，冇試過由外籍英語母語教師教，我都學得幾好，所以對佢哋嘅功能一直有啲懷疑。」

佢更加挑戰教育局所講「NET可以帶來唔同外國文化」嘅說法：「你話要學生接觸唔同文化，但而家啲NET唔止來自英、美，仲有愛爾蘭、加拿大，甚至俄羅斯都有，咁究竟學生係學緊邊一種英語呢？」

蔡若蓮回應葉劉淑儀時指出，NET唔再局限於來自英國或美國，因為英語本身已經成為全球「Lingua Franca」（通用語言）：「依家好多人講英文都唔係英美出身，但佢哋一樣可以用流利英語同人溝通，NET計劃希望學生接觸多種語音同文化，擴闊視野。」《I》