美國貿易代表辦公室（USTR）喺3月31日發表咗最新一份《2024年外國貿易壁壘評估報告》，全份報告接近400頁，差唔多八分之一篇幅專講中國，更提到香港喺國安法實施後引發嘅結構性變化。

美國貿易代表格里爾（Jamieson Greer）喺聲明中表示，「近代歷史上，冇一位總統好似特朗普咁清楚知道美國出口商正面對住咁廣泛又具破壞性嘅外貿壁壘。」佢強調，特朗普政府正積極出招，處理呢啲唔公平嘅做法，恢復公平貿易秩序，幫助美國企業同工人喺全球市場爭番地位。

關於中國內地，報告披露中國仍未履行特朗普首個總統任期內同北京簽署嘅貿易協議，例如開放農業市場、保護知識產權等承諾都未實現。報告指出，中國近年積極發展包括機械人、航天、新能源車、生物製藥等「重點戰略產業」，透過產業補貼、歧視性政策、壓迫外資等方式，助長本地企業壯大，令外國對手喪失市場份額。

關於香港，報告明言中國政府喺2020年及2024年喺港實施《香港國安法》同《基本法》第23條所制定嘅《維護國家安全條例》，已經令香港出現「重大結構性轉變」，直言香港自治權大幅削弱、人權同基本自由受到打擊。

報告提到，國安法第31條規定，無論法人定非法人團體，只要涉嫌違反條文都可以被檢控，涵蓋範圍包括本地公司、外資企業、國際NGO甚至媒體。特朗普喺2020年7月簽署第13936號行政命令，認定香港已經失去足夠自治，取消香港享有同中國內地唔同待遇嘅豁免政策，事關美國國家安全同外交政策受到威脅。而喺2024年3月23日，《維護國家安全條例》正式通過，美方認為條例吸納咗北京對國安嘅極度寬泛定義，針對某啲罪行施以極重刑罰，例如終身監禁。美國政府其後喺9月6日再發布針對香港嘅最新商業風險諮詢，警告企業喺港營運可能面對風險。

除咗國安問題，報告亦關注香港喺智慧財產權執法方面存有漏洞。報告提到，香港喺2022年通過咗《2022年版權（修訂）條例》，2023年5月1日生效。新法例雖然賦予版權持有人有權控告非法串流傳播其作品，但未有針對非法串流裝置（俗稱ISD）列明具體打擊條文。

報告引述美國業界人士指，香港對ISD相關刑事執法力度不足，市面上電子產品舖、網店隨處可見ISD，變相縱容侵權情況。雖然香港海關不時查獲侵權貨品，包括假藥、仿冒名牌等，但美方官員同私營企業都認為，流入香港甚至轉口出口其他市場嘅侵權產品仍然大量存在。

報告亦唔留情批評歐盟同加拿大，指歐盟以環保為由，限制使用部分殺蟲劑、基因改造作物同荷爾蒙肉類，構成「非關稅貿易壁壘」。而一項新法草案，要求可可、牛肉同棕櫚油生產商追蹤供應鏈來源以防砍伐森林，美國亦認為會拖慢貿易流程。另外，報告又炮轟歐盟科技政策過度規管，例如限制網絡內容分享、阻止個人資料轉移至非歐盟地區、收緊對大型科企嘅要求，美方擔心會影響美國科技企業全球競爭力。

至於加拿大方面，美方主要針對佢哋嘅乳製品、蛋類、雞肉等供應管理制度，質疑制度過於保護本地農戶，導致美國生產商難以打入加拿大市場。報告又話，加拿大對網絡平台收入徵收3%數碼服務稅，等同歧視喺全球網絡廣告同社交平台市場上佔主導地位嘅美企。《I》