法國政壇近日掀起波瀾，極右翼政黨「國民聯盟」（National Rally）領袖瑪琳·勒朋（Marine Le Pen）日前被法院裁定貪污罪成，重判5年內唔可以參選任何公職，直接打亂咗佢原定2027年再次參選總統嘅大計。瑪琳·勒朋強烈反彈，直指今次係「赤裸裸嘅政治操作」，誓言絕唔會就此退場，仲講明會上訴到底。

根據《法新社》同《路透社》綜合報道，今次案件涉及瑪琳·勒朋代表「國民聯盟」期間，涉嫌喺歐洲議會撥款下製造虛假助理職位，實情就係請啲人返嚟幫政黨做嘢，但人工就由歐洲議會埋單。一共有24名「國民聯盟」成員或者助理被定罪，瑪琳·勒朋都唔例外。法庭下令，佢即時被禁止參選公職，令佢震驚又激憤。

分析認為，2027大選將會係佢最接近法國總統寶座嘅一戰，而家突然被踢出局，無疑係一次重大打擊。2027年本應係佢第四次參選，民調亦顯示佢有望輕鬆贏得首輪選票，進入決選輪同其他對手一對一對決。

裁決一出，唔少國際極右翼人士即刻跳出嚟聲援，包括俄羅斯克里姆林宮、美國特斯拉創辦人暨政府效率部領導人馬斯克、匈牙利總理歐爾班，同荷蘭右翼政客懷爾德斯（Geert Wilders），齊聲譴責今次判決係「打壓異見」。

面對突如其來嘅禁令，瑪琳·勒朋喺接受法國電視一台（TF1）訪問時，情緒堅定表示會即刻提出上訴，仲話：「我唔會就咁俾人清除出政壇。我會用盡一切法律手段去抗爭。雖然條路好窄，但仍然有得行！」佢又指責法官出於政治動機阻止佢參選：「法官根本唔想我當選總統，佢哋所用嘅手法，簡直係我哋過去以為只有專制政權先會用嘅！」雖然佢表示「我要上訴，因為我清清白白」，但亦坦言喺目前形勢下，佢基本上已經被踢出2027年總統戰局。

目前，國民聯盟已經喺2024年國會選舉後成為法國國會最大政黨，地位水漲船高。由於現任總統馬克龍已連任兩屆，根據憲法規定無得再選，因此外界原本認為瑪琳·勒朋幾乎篤定係2027年嘅總統大熱。

至於後備方案，黨內目光就落咗喺瑪琳·勒朋嘅愛將、年僅29歲嘅國民聯盟主席巴德拉（Jordan Bardella）身上。佢並唔係今次案件嘅調查對象，但黨內外都有聲音質疑，呢位年輕領袖到底夠唔夠班接棒參選。畢竟，要取代瑪琳·勒朋咁多年累積下嚟嘅民望，同時應對選戰壓力，對一位未夠三十歲嘅人嚟講絕對唔係易事。《I》