針對長和出售海外碼頭業務一事，黨媒《大公報》今（1日）第二十日發文批評。繼昨日《大公報》稱當局可祭出《反壟斷法》並結合《國安法》、《資料安全法》等對付長和後，今日又稱長和作為香港重要企業，必須尊重國家利益、立即中止錯誤交易，否則就係破壞「一國兩制」 、無視一國原則。

《大公報》引述國家市場監督管理總局指出，針對長和呢種「非一般買賣」進行審查，係合情合理合法。作為香港重要企業，長和必須尊重國家利益，承擔最基本嘅責任同義務，並應該「立即中止錯誤交易」。

《大公報》指出，自從交易公布以嚟已經接近一個月，海內外對事件嘅強烈質疑一直未停，原因係因為呢宗交易絕對唔係所謂嘅「普通商業行為」。喺目前美國千方百計圍堵中國之際，《大公報》認為，過去充分享受「一國兩制」紅利、從國家發展中獲益良多嘅香港企業，應該具備基本道義，主動捍衛國家利益。文章強調，「國家強盛則商業興盛，國家受困則企業受損」，道理淺顯易明。

《大公報》批評，令人失望嘅係，公眾至今未見相關企業作出任何正面回應，反而見到相反做法，例如主動放風、抹黑輿論、製造混亂，令事件更加複雜。又話近日香港社會出現一啲「歪論」，例如審查會破壞「一國兩制」、影響香港地位，又有人話應該「靜一靜、等一等，唔好咁快干預」。

對此，《大公報》強調，「一國兩制」最高原則就係維護國家主權、安全同發展利益，國家利益愈受到保障，香港利益先至愈穩妥。依法審查正正係維護國家安全嘅實際行動，「慢不得、等不得，又指相關措施唔單止唔會破壞香港角色，仲可以鞏固發展環境。

《大公報》最後批評，有關企業「只談交易、不講國安」，喺過去一個月內不斷迴避問題，甚至玩「公關」手法混淆視聽，先至係無視「一國」原則、有損「一國兩制」嘅行為，「大義面前無小事，盡快回頭，長和現在還來得及」。

根據長和月初公布嘅交易細節，是次出售嘅資產涉及多個位於中國內地同香港以外嘅港口項目，包括戰略價值極高嘅巴拿馬兩端碼頭設施。若交易成功，長和將可套現逾190億美元（約1,482億港元）現金。不過，交易一宣布就火速引起北京當局關注。港澳辦、中聯辦先後轉載《大公報》批評有關交易嘅評論文章，質疑該項出售可能損害國家利益。

上週末，據《星島頭條》、《南華早報》等本地傳媒引述接近長和高層嘅消息人士報道，原定簽約儀式將會押後，唔會如期進行。當被問及原因時，該人士只語帶玄機咁話：「大家明啦」。外界普遍解讀為「暫緩交易」。而《大公報》就繼續施壓，稱若不懸崖勒馬，當局不僅可祭出《反壟斷法》，仲可以結合《國安法》、《資料安全法》等。《I》