長和出售海外碼頭業務嘅爭議愈演愈烈，原本計畫會喺星期三（4月2日）同由美資主導、貝萊德牽頭嘅財團正式簽約，但事件爆出戲劇性轉折。據本地傳媒引述接近長和高層嘅消息人士話，原定簽約儀式將會押後，唔會如期進行。當被問及原因時，該人士只語帶玄機咁話：「大家明啦」。外界普遍解讀為「暫緩交易」。而《大公報》就繼續施壓，稱若不懸崖勒馬，當局不僅可祭出《反壟斷法》，仲可以結合《國安法》、《資料安全法》等。

根據長和月初公布嘅交易細節，是次出售嘅資產涉及多個位於中國內地同香港以外嘅港口項目，包括戰略價值極高嘅巴拿馬兩端碼頭設施。若交易成功，長和將可套現逾190億美元（約1,482億港元）現金。不過，交易一宣布就火速引起北京當局關注。港澳辦、中聯辦先後轉載《大公報》批評有關交易嘅評論文章，質疑該項出售可能損害國家利益。《彭博》上周三(26日)引述消息報道，長和當時並無受到中方態度影響，仍按計劃推進，並努力敲定盡職調查、稅務、會計及其他交易條款，目標係4月2日前正式簽約。

不過，事情快速發生變化，本週末本地媒體《星島頭條》、《南華早報》報道，有接近長和高層消息人士指，下周唔會正式簽署有關兩個巴拿馬港口嘅協議。雖然交易暫緩，但《大公報》並未就此收手，引述內地多位權威人士，認為國家審查呢項交易有理有據，有法可依。

《大公報》指收到中國國家市場監督管理總局針對暫緩交易嘅獨家回覆：「已經注意到此交易，將依法進行審查，保護市場公平競爭，維護社會公共利益」。《大公報》強調：「請注意『暫緩』，並非『取消』」，暗示事件未完，仍有後着，又引述《南華早報》指，4月2日其實唔係「真正最後期限」，呼籲長和要「懸崖勒馬，顧全國安，終止交易」。

《大公報》又引述北京漢坤律師事務所資深合規專家解石坡嘅分析，指出該交易或觸及《中華人民共和國反壟斷法》審查門檻。話根據中國法例，當買賣雙方上一個會計年度喺中國嘅營業額合計超過特定數字（如8億元人民幣或全球達120億元），就必須提前向市場監管總局申報，獲批之後先可以正式交易。又指出，即使目標資產係境外港口，但若果服務對象包括中國船公司或客戶，所產生嘅營業額都可以被納入中國境內收入計算，亦即係話——只要目標公司同中國有業務往來，就可能構成須申報交易。

除咗反壟斷審查，《大公報》又引述康達律師事務所高級合夥人苟博程指出，呢單交易仲可能觸及《國家安全法》、《數據安全法》等法律風險。佢解釋，根據反壟斷法第二條，即使係境外交易，只要對中國市場構成排除或限制競爭嘅影響，中國監管部門就有權介入。今次出售嘅港口雖然喺外國，但可能經由國際航運鏈條影響中國船公司嘅營運成本，甚至供應鏈安全，因此有理由展開審查。指呢類港口設施或涉大量敏感數據，監管部門可考慮相關系統有冇地緣政治風險，同時從國安角度審慎處理。

內媒《財經雜誌》就指出，根據中方法規，只要對中國市場競爭產生重大影響，中方就有權審查。一旦進入審查，期限為180天，但亦可能延長。審查結果可能係「附條件批准交易」或者「禁止交易」。報道引述不願具名嘅業內人士表示，由公開信息分析，交易雙方同監管機構可能在溝通但仲未申報。又話無論該交易是否符合必須申報嘅條件，根據反壟斷法，市場監管總局依然可以審查未達到申報標準、但可能對中國市場競爭產生重大影響嘅案件。《I》