中國成日講要「彎道超車」美國，但根據日本經濟研究中心（Japan Center for Economic Research）最新出爐嘅50年長期經濟預測，中國想喺GDP總量上反超美國，恐怕要等到下世紀。該研究機構指出，如果依家趨勢冇大改變，美國同中國嘅經濟總量到2075年依然分別排全球第一、第二，名次無得郁。但有個變數：如果美國總統特朗普嘅移民同貿易政策長期持續影響，呢個排名可能會喺2049年出現逆轉。

呢份由《日經中文網》報道嘅預測報告，每五年公布一次，今次屬於期中版本，完整報告預計會喺夏季出爐，屆時會納入日本本土經濟改革前景。報告涵蓋全球83個國家同地區，連台灣都有包埋。

🧮 中國生育率直插0.8　GDP難追美國

研究中心指出，未來半個世紀，美中兩國將繼續靠住人工智能（AI）、資訊服務、金融、保險等行業拉高生產力，穩坐全球GDP頭兩位。但中國面對最大問題唔係科技，而係人口！佢哋預測，到2075年中國總和生育率（即每名女性平均生幾多個小朋友）會跌至極低水平——只得0.8，遠遠低過2.1嘅人口更替水平。

咁低生育率意味住，中國將會步日本後塵，人口急劇老化兼收縮，經濟增長自然受到限制。報告話，基於咁嘅推算，除非出現重大政策變動，中國喺GDP總量上要趕過美國，基本上冇乜可能。

📉 特朗普政策成唯一變數？2049或現逆轉

但報告話，若果特朗普嘅移民收緊政策長期化，美中GDP名次仍有可能逆轉。具體嚟講，假如美國喺2026年起，連續12年每年遣返約100萬非法移民，兼且限制合法移民入境，美國勞動人口將明顯減少，經濟動力大削，到2049年或會被中國趁機超前。

報告同時指出，雖然AI等新科技有助提升效率，但全球人口老化係一個無可避免嘅硬傷。整體嚟講，全球平均經濟增長率喺2021至2030年仍可維持3.3%，但去到2071至2075年，將會跌到只得1.3%，同期全球出生率亦會下降至1.7。

🌍 全球排名洗牌：印度升第3、日本跌出Top 10

喺未來50年全球經濟排位方面，報告預測印度將會強勢上位，到2075年攞到全球GDP第3名。之後依次為德國、印尼、英國、墨西哥、巴西、加拿大同法國。反觀日本，喺2024年仍排第4，但到2075年將跌落去第11位，顯示其人口老化同經濟停滯問題愈嚟愈嚴重。

至於亞洲其他地區，亦唔樂觀——預測話亞洲整體人口將喺未來幾十年開始萎縮，尤其係東亞地區。而唯一例外就係非洲，未來50年將繼續高速增長，喺2040年代中期有望超越東亞，成為地球人口最多地區。報告亦提到，去到2075年，由中國、印度、俄羅斯、巴西等組成嘅金磚國家（BRICS）再加埋其他發展中成員，總共十個國家嘅GDP總和將會超越美國，達到其1.4倍。《I》