加沙戰火重燃，以色列總理內塔尼亞胡週日（30日）表示，可以畀哈馬斯領導層離開加沙，不過條件係必須全面解除武裝。佢喺內閣會議上表示，「我哋喺炮火中談判」，重申軍事壓力見效，「哈馬斯會放低武器，佢哋啲領導人可以走，但我哋會確保加沙整體安全，並推動『特朗普計畫』。」

所謂「特朗普計畫」，係早前美國總統特朗普提出、極具爭議嘅「自願」遷移方案，即係建議將生活喺加沙嘅240萬巴勒斯坦人遷移去其他國家，再由美方主導重新開發加沙地區。此方案一出，引發國際社會強烈質疑，特朗普後來就話「唔會強迫」，但會「建議大家坐低傾傾」。

內塔尼亞胡最新講法正好回應近日有傳以方拒絕加入人質交換談判。佢強調軍事行動有效，已經逼到哈馬斯內部出現裂縫：「軍事壓力發揮緊作用，我哋會繼續推進。」而哈馬斯就表示願意移交加沙行政機構，但強調武裝係一條「紅線」。

不過，有跡象顯示雙方或有回旋空間。哈馬斯一名高層官員喺星期六透露，已經接受由調解人提出嘅新停火建議，並促請以方正面回應。以色列總理辦公室亦證實已收到相關提案，並已提交一份還盤。不過，具體內容暫時未有公開。

同一時間，加沙戰場火勢不減，流血場面一浪接一浪。根據加沙民防機構通報，以軍喺開齋節第一日（31日）早上空襲汗尤尼斯，擊中一幢住宅同一個為流離失所者設立嘅帳篷，最少造成八人死亡，包括五名兒童。南部城市拉法亦遭襲擊，兩名兒童受傷，目擊者形容場面「血肉模糊」。

以色列喺3月18日結束為期近兩個月嘅停火，重新對加沙地帶展開大規模轟炸，並陸續展開地面攻勢。加沙居民再次陷入無休止嘅逃難，醫療資源極度短缺，聯合國警告當地人道災難已「全面爆發」。另一方面，戰火擴大至區域層面。伊朗支持嘅也門胡塞武裝表示，為咗聲援巴勒斯坦人，周日再向以色列發射導彈同無人機。以色列軍方話，成功喺導彈飛入以色列前將其攔截。胡塞武裝過去幾個月多次攻擊紅海同亞丁灣海域，聲稱係為咗「打擊猶太政權」。

國際社會雖然多番調停，但進展牛步。據悉，埃及、卡塔爾同美國依然試圖斡旋停火，目標係促使以哈雙方釋放人質、全面停火。不過內塔尼亞胡就強調：「戰爭未完，哈馬斯未倒」，表明以色列冇打算即刻收手。《I》