科技億萬富翁馬斯克（Elon Musk）負責縮減聯邦政府規模，佢週四（27日）表示，有望喺64天之後任期結束前，完成削減1萬億美元聯邦支出任務嘅大部分工作。

馬斯克喺27日上《霍士新聞》接受專訪，正式對外披露行動進展，佢話：「我哋目標係將總支出由現時大約7萬億美元，縮到6萬億，我相信喺64日內大部分都搞得掂。」

白宮以「特別政府雇員」身分任命馬斯克帶領DOGE，限期係130日，意味住佢最遲5月底就要交卷。馬斯克喺訪問入面強調：「我哋並唔係亂砍亂削，而係針對性剪走無謂嘅浪費同貪污。唔會影響到社會安全、國防、醫療等重要服務。我哋相信可以慳到15%。」

根據DOGE截至3月24日公布嘅數據，馬斯克團隊透過裁員、變賣政府資產、取消冗餘合同等手段，已經為納稅人慳咗約1,150億美元。不過，有專家指出，DOGE公布嘅節省數字難以獨立核實，早前曾經出現錯誤計算並需要更正。而且，由於特朗普已經公開承諾唔會動福利項目（例如社會保障），有預算分析員質疑，馬斯克根本難以達成大幅削減目標。

今次係馬斯克同DOGE核心團隊首次一齊現身傳媒。除咗馬斯克，同行仲有佢旗下隧道建設公司「無聊公司」（The Boring Company）總裁史提夫·戴維斯（Steve Davis），以及Airbnb共同創辦人喬·蓋比亞（Joe Gebbia）等七位高層。

馬斯克強調：「我哋做緊嘅事，係為咗唔好令美國沉船。聯邦政府支出無止境，再唔處理就玩完。」不過，馬斯克主導「政府瘦身」計劃，亦引嚟唔少政治反彈。尤其係政府大幅裁員嘅消息傳出之後，全美多間特斯拉（Tesla）門市及經銷商連番遭人破壞，甚至出現抗議行動，有人懷疑係針對馬斯克本人施壓。

FBI局長帕特爾（Kash Patel）本週一證實，聯邦調查局已經成立特別小組，針對一連串襲擊特斯拉事件進行調查。FBI表示，相關案件可能涉及蓄意破壞，甚至有人試圖製造社會動盪。

針對總統特朗普同科技富豪馬斯克嘅示威潮持續升溫，已經遍佈全國各州，由東岸嘅華盛頓特區，一直蔓延到西岸加州灣區。民眾抗議聲音愈來愈激烈，甚至有激進分子訴諸暴力，針對特斯拉車輛嘅縱火同槍擊事件接連發生。有唔少車主表示，因為馬斯克而對特斯拉產生反感，揸部特斯拉出街會覺得「丟架」，為咗避嫌，唔少人選擇割席賣車。《I》