美國總統特朗普再次喺國際舞台大搞「美國優先」，今次目標直指世貿組織（WTO）。法廣引述內部消息報道，華盛頓已經暫停繳交2024至2025年度世貿預算會費，仲正式被世貿歸類為「一類拖欠成員」，美方代表喺世貿入面地位大插水，唔單止冇得主持機構會議，連正式文件都唔再優先收得。

特朗普批評世貿偏幫他國

根據由路透社獨家獲得世貿組織喺今年2月21日一份標有「限制」字樣嘅內部文件，截至2024年底，美國已經拖欠會費2,270萬瑞士法郎，約2,570萬美元。按照世貿規定，任何成員國一旦拖欠會費超過一年，就會被分類為「一類拖欠成員」，等於係行政上被「降級」，失去主持會議同發言優勢權。

世貿發言人迪昂（Ismaila Dieng）已證實，美方代表確實已經喺預算委員會被通知為「一類拖欠」，需承擔相關後果。他話：「秘書處會繼續審慎管理資源，以應對任何因拖欠款項造成嘅財務限制。」

其實早喺2019年，特朗普第一次做總統期間，美國就已經對世貿「落重手」。華府當時阻止新法官任命，搞到WTO最核心嘅爭端解決機制——上訴機構——至今仍然無法正常運作，幾乎形同癱瘓。美國一直批評世貿上訴機構「越權審案」，批評裁決偏幫其他國家、對美國不利。

美國同非洲國家並列第一類拖欠成員

3月4日，喺世貿預算會議上，美方代表向其他成員講明，美國正進行全面檢討所有國際組織嘅會費安排，因此暫時擱置對2024及2025年預算嘅任何付款。華府未有交代會喺幾時通知世貿最終決定。白宮方面冇即時回應記者查詢，而美國駐日內瓦嘅WTO代表團發言人亦未有作出正式回應。

不過，有第三位貿易圈內人士向路透社證實，美國係真係唔交錢，而WTO秘書處已經開始研究所謂「Plan B」，應對資金流斷咗可能出現嘅長期營運危機。佢冇透露更多細節。

根據世貿文件，截至2024年底，除咗美國，仲有五個國家被列入同一類拖欠組別，包括玻利維亞、剛果（金）、吉布提、加蓬同岡比亞。總共仲有3,840萬瑞士法郎（約4,347萬美元）未交清，當中除咗今年會費，亦包括之前累積嘅欠款。

由於WTO每年預算都係按各國喺全球貿易所佔份額分攤，美國佔比高達11%。世貿2024年整體預算為2.05億瑞士法郎（約2.32億美元），美國一唔交，立即出現過千萬美元缺口，對運作帶嚟沉重壓力。《I》