波蘭總理圖斯克喺法國巴黎出席「志願聯盟」高峰會之後，歷史性宣布波蘭同法國即將簽訂一份安全保障條約，並強調呢份條約有機會成為歐洲安全格局嘅轉捩點。

呢場喺星期四舉行嘅「志願聯盟」峰會，齊集咗27個主要來自歐洲嘅國家領袖，大家嘅共識就係：要繼續支持烏克蘭，抵抗俄羅斯侵略，唔可以退縮。會後，圖斯克同法國總統馬克龍進行咗面對面會談，重點談及波法兩國關係同埋區域安全議題。

圖斯克話：「我哋而家喺敲定波蘭同法國之間嘅條約，希望好快就可以簽署。」雖然佢無透露協議具體內容，但強調呢可能會係歐洲同北約安全願景入面嘅一大突破。圖斯克補充話，波蘭喺條約談判上嘅立場獲得完全認可，足見歐洲各國對波蘭嘅戰略地位愈嚟愈重視。

早喺今年1月，波蘭外交部長Radosław Sikorski訪問巴黎時都曾透露，波法合作條約已經進入尾聲，預計數月內會完成談判。佢當時仲話，呢份新條約會大大推動波法雙邊關係，並且係「歐洲同波蘭安全保障向前邁進重要一步」。

圖斯克仲透露，馬克龍喺會上強調，無論以乜方式支援烏克蘭，包括有傳派維和部隊，都絕不能影響北約同歐盟東面防線嘅防禦力。圖斯克話波蘭會繼續有效支持一切爭取和平嘅行動，最重要係要確保我自己邊境同北約、歐盟東部邊境嘅安全。佢強調：「大家終於都明白呢點。」

馬克龍喺記者會上則補充，目前對於法國同英國提出派駐國際部隊去烏克蘭監督停火嘅建議，尚未有共識。但圖斯克話，會上各國領袖對於俄羅斯侵略鄰國嘅行為同埋繼續支援烏克蘭嘅必要性，立場一致。佢話，歐洲目前清楚知道，要盡最大努力維持同美國嘅良好關係，「即使有時情況唔係咁理想」。佢承認，美歐之間有分歧，但強調「唔可以放棄合作」。

雖然歐洲整體對俄羅斯態度強硬，但唔係所有人都行同一條路。圖斯克提到，匈牙利一再拒絕投票支持對莫斯科嘅制裁，拖慢整個歐盟對俄政策，但佢強調：「我哋仍然要搵方法，令歐洲可以繼續執行聯合政策，唔可以畀個別國家拖慢整體步伐。」圖斯克最後總結話：「無論外圍情況點變，歐洲都要更加堅定咁撐住烏克蘭，同時強化自己防守能力，唔可以再靠他人。」

今次高峰會唔止歐盟國家參加，英國、加拿大、土耳其、挪威、烏克蘭等國領袖，以及北約同歐盟高層官員都到場，顯示西方陣營喺烏克蘭議題上，依然保持高度關注。

美國喺第二次世界大戰後成為自由世界領導者。近80年來，歐洲安全一直奠定於《北大西洋公約》第5條基礎上，該條規定，他國對北約任一個成員國嘅攻擊，便係對所有成員國宣戰。但呢套秩序喺美國總統特朗普上台後，面臨天翻地覆嘅轉變。今年2月，特朗普公開話，如果北約國家「唔交保護費」，美國就唔會幫佢哋打仗」。有分析認為，歐洲各國推進雙邊安全協議，正正係為咗應對美國可能撤退嘅局面。《I》