美國總統特朗普本週三（26日）喺白宮宣布，將由4月2日起對所有喺外國製造、然後進口返美國嘅汽車徵收25%關稅，無論係外國品牌定美國車牌、只要喺海外組裝都會課稅。消息一出，美股應聲下跌，美國本土車廠股價亦全面受壓。

特朗普喺記者會上高調話：「今次加徵汽車關稅，係為咗縮細美國長期以嚟嘅貿易逆差，吸引車廠搬返嚟美國生產，亦都係『美國解放日』嘅開始。」佢仲放風話，下星期仲會有更大規模嘅關稅措施出台。

呢項汽車關稅將喺4月2日生效，翌日正式徵稅，範圍涵蓋所有運往美國嘅完整車輛，包括私家車、SUV、跨界車、小型貨車、Van同輕型卡車，仲包括引擎、波箱、電子零件等一系列關鍵汽車部件。

白宮幕僚秘書沙夫（Will Scharf）表示，加稅唔單止係為咗保護本土製造，仲預期可以為美國每年帶嚟高達1000億美元嘅關稅收入。特朗普就更樂觀，話兩年內呢筆收入可能高達6000億至1萬億美元，足夠減輕債務壓力，甚至實現減稅。特朗普仲話，汽車關稅亦會帶動建築業同汽車產業創造大量職位，變相幫助整體經濟。「美國人將見證我哋點樣搶返屬於自己嘅工業。」

根據《紐約時報》引用華爾街顧問公司伯恩斯坦（Bernstein）數據，目前美國有一半汽車依賴進口，即使喺美國境內組裝，近六成零件都來自海外，包括墨西哥、日本、南韓、加拿大同德國。其中德國車廠喺墨西哥同加拿大都有設廠，意味住呢啲國家將面臨沉重打擊。報道又指出，呢項新政措施恐怕會嚴重擾亂車廠供應鏈，尤其依賴國際協作嘅品牌首當其衝，亦會進一步抑制企業投資意欲，打擊長遠發展。

代表國際車廠利益嘅團體「Autos Drive America」發表聲明，指喺而家高通脹壓力底下，再加汽車關稅簡直係「雪上加霜」，只會進一步推高汽車售價，消費者首當其衝，生活負擔只會越嚟越重。又警告，此舉可能會掀起新一輪貿易戰，尤其係歐洲、日本、南韓等向美國出口大量汽車嘅國家，或會出手報復。

會計師行KPMG分析師Ken Kim則指出，2月時已經見到汽車同零件訂單大幅上升，估計係因為廠商趕喺新稅生效前搶單。佢仲引述業界意見，話未來新車價格有可能會加幾千美元，甚至加超過1萬美元。