《彭博》今（26日）引述消息人士報道，長和集團計劃如期推進將兩個巴拿馬港口出售予貝萊德財團嘅交易。黨媒《大公報》今（26日）亦再度第N次發文砲轟長和，稱該公司非但至今都未見有任何實質行動停止交割，反而表現出「陰陽兩面」嘅操作，一方面拒絕正面回應，另一方面又喺媒體安排「請槍」散播混淆視聽嘅觀點。

《大公報》批評長和集團「打包」出售包括巴拿馬運河港口喺內等資產嘅決定，形容呢個舉動引起海內外廣泛質疑，更指相關企業至今都未見有任何實質行動停止交割，反而表現出「陰陽兩面」嘅操作，一方面拒絕正面回應，另一方面又喺媒體安排「請槍」散播混淆視聽嘅觀點。

文章引述《南華早報》報道指，一名本地地產代理公司嘅董事總經理披露，曾收到長和內部聯繫人要求撰文，為出售港口交易辯護。該文章隨後刊登喺本地網站，而類似立場嘅評論亦接連喺媒體出現，重點強調兩個說法：其一，交易純屬商業決定，中央同特區政府最初未有反對；其二，否認美資背景嘅貝萊德係核心買家，聲稱買家為李家嘅「世交」同意大利人。

不過，《大公報》認為呢啲論調明顯係有組織嘅「請槍」行為，目嘅係混淆視聽，既唔負責任，亦未有正面交代問題核心。文章指出，呢單交易遠非單純嘅商業行為，而係涉及國家安全同戰略利益嘅重要問題。港口屬於關鍵基礎設施，唔容隨意轉讓畀外資。

文章又強調，喺而家嘅地緣政治形勢之下，如果全球43個港口碼頭落入美資控制，勢將對中國造船、航運、「一帶一路」同整體國際貿易造成嚴重衝擊，國家利益甚至地緣政治穩定都會受到威脅。

文章進一步指出，交易方雖然以「世交」為理由撇清同美資嘅關係，但事實上主導收購嘅財團由貝萊德牽頭，其美資背景難以否認。再者，美方近年唔斷發出聲音要「收回」港口嚟打壓中國，而家啱啱就有美資財團出手收購，時機極其敏感，難以視為巧合。

《大公報》聲稱，針對事件嘅質疑同批評，唔係所謂嘅「文革式批鬥」，更唔係針對企業本身，而係基於國家、香港同企業長遠發展嘅「善意提醒」。企業逐利無可厚非，但有責任從國家整體利益出發，計算長遠嘅發展大賬，尤其喺香港同國家命運緊扣嘅背景之下，更應該承擔應有嘅責任。

文章最後引用古語「覆巢之下，焉有完卵」，以及孟子嘅「不義而富且貴，於我如浮雲」，勸喻相關企業千祈唔好誤判形勢，要慎重行事，以免一錯再錯，釀成無法挽回嘅後果。

《彭博》報道指，目前各個交易方正致力完成盡職調查、稅務、會計同其他交易條款，仍計劃在4月2日前簽署協議，顯示中國對該交易嘅不滿未有影響談判。《I》