《大西洋月刊》總編輯戈德伯格（Jeffrey Goldberg）竟然被加入咗特朗普政府高階官員嘅通訊群組，見證國安顧問華爾茲（Mike Waltz）、國務卿盧比奧（Marco Rubio）、副總統萬斯（JD Vance）等人，喺Signal群組內大談點樣打擊也門胡塞武裝。消息一出震撼外界，但總統特朗普就反問記者「佢哋喺群組討論咩？」
意外被拉入群組：以為係圈套
事件要追溯到3月11號，戈德伯格突然收到華爾茲透過Signal發出嘅群組邀請。Signal係一款強調加密嘅通訊App，一般多用作安排會議或非敏感資訊交流。戈德伯格一開始都懷疑係唔係釣魚騙局，始終特朗普政府一向對傳媒敵意甚重，尤其係佢所屬嘅《大西洋月刊》，過往多次批評特朗普本人。不過出於職業本能，加上記者直覺，佢都係決定接受邀請。
兩日後，3月13號，戈德伯格正式被加入一個新成立、名為「胡塞PC小組」嘅Signal群組。入面竟然有18位特朗普政府高官，包括副總統萬斯、國防部長赫格塞斯（Pete Hegseth）、中央情報局局長拉特克利夫（John Ratcliffe），甚至國務卿盧比奧。特朗普本人就無喺群組之內。
華爾茲喺群組內發號施令，要各部門指派專人作為聯絡窗口，籌備針對胡塞武裝嘅空襲計劃，並組成跨部門應變小隊。戈德伯格眼見一連串如假包換嘅高層對話，初時仲以為係情報戰，或甚至係特朗普政府設局誣陷反對派傳媒。
群組密謀空襲 邊鬧拜登邊諗着點撈著數
3月14號，萬斯、副總統辦公室成員、候任反恐中心主任Joe Kent同赫格塞斯等，陸續就行動策略、輿論鋪排發表意見。幾位高層明言要喺空襲胡塞武裝時，把握機會猛轟拜登政府對伊朗政策軟弱，同時反襯特朗普領導力如何出色。
群組內更討論要歐洲盟友「付出代價」，補貼美方軍事行動。萬斯等人更指，美國已經幫歐洲「孭水」太耐，今次出兵要搵機會回本。雖然萬斯喺公開場合極力表忠，但戈德伯格觀察其發言語氣，似乎對於攻擊行動會否影響中東海域經濟運作抱有保留。
全程潛水甚至退群都無人發現
由始至終，戈德伯格都無喺群組內出聲，只係潛水靜觀其變。直到3月15號，赫格塞斯喺群組發表長文更新，內容具體講到美軍即將進行嘅軍事行動、戰略部署等詳情。
幾個鐘頭之後，五角大樓正式公佈美軍喺也門發動空襲。對照群組裡面講嘅細節——時間、地點、行動規模——完全吻合。戈德伯格即刻意識到，呢個群組，唔係假嘅，係真嘅，佢當場感到一身冷汗。佢隨即退出群組，本以為會引起群組管理員華爾茲注意，但幾日過去無任何人發現或追問。
佢之後主動聯絡華爾茲、赫格塞斯、情報總監圖爾斯（Tulsi Gabbard）等官員求證，暫時無收到回覆。白宮國安會發言人休斯（Brian Hughes）只向《華盛頓郵報》低調表示：「對話串睇落真係真。」
特朗普本人被傳媒問到件事時，就反問記者：「佢哋喺群組講乜嘢？」並補充一句：「我唔係特別鍾意大西洋月刊」。副總統辦公室則回應傳媒稱，萬斯一向同特朗普立場一致，否定戈德伯格對其發言嘅解讀。
涉事官員或觸犯間諜法 特朗普亦曾帶走機密文件被起訴
多名美國資深國安法律界人士表示，若群組內容屬實，華爾茲將涉嫌違反《美國間諜法》。有律師指出，即使辯稱所談內容並非機密，都難掩行為本身違規。而華爾茲喺群組設定自動清除訊息功能，涉嫌違反《聯邦紀錄法》。根據法律，所有官員業務通訊記錄都要妥善保存，以供未來審查及責任釐清。
有前政府官員透露，以往只會喺出訪期間無法使用政府內網時，用Signal簡單溝通非敏感事項，從未用作軍事決策或機密討論。不過，特朗普本人亦曾因私自帶走機密文件回家被起訴（當選總統後案件被撤銷）。《I》
