內地唔少人鍾意信啲民間偏方，但一個唔小心，就可能會出事！廣東珠海一名中年男子早前因誤信坊間流傳嘅偏方，喺屋企自行食用蟾蜍（俗稱癩蛤蟆），最終因嚴重中毒送院搶救仍不幸身亡。

唔係煲耐啲就冇毒　高溫煮四粒鐘都仲有毒！

蟾蜍體內含有多種劇毒成分，當中包括「蟾蜍毒素」、「類腎上腺素」等，呢啲成分一旦進入人體，會直接攻擊心臟、神經系統同埋消化系統。醫學界指出，中毒者可能會出現噁心、嘔吐、肚痛、腹瀉、頭暈、心跳加速、心律不齊等症狀，情況嚴重嘅話，更可能導致呼吸衰竭、甚至心臟驟停，後果非常嚴重。

有人以為蟾蜍淨係背脊有毒，只食條腿就安全，其實係大錯特錯。據珠海市疾病預防控制中心指出，蟾蜍毒素可以透過淋巴系統傳遍全身，唔單止皮膚同耳後腺有毒，連肌肉、肝臟、卵巢都有毒素存在。

仲有人以為「泡酒食」可以消毒，但專家強調，酒精不但無法破壞毒素，反而會加快毒素釋出，令毒性更易進入人體。內地近年已經有唔少飲用「蟾蜍酒」致死嘅案例。

其實就算用高溫烹煮都冇用。有研究發現，即使用攝氏120度高溫煮蟾蜍達四小時，毒素依然無完全分解，證明佢毒性極之穩定，唔係一般家用烹調方式可以去除。

疾控中心：無特效解毒藥

唔止食入口會出事，蟾蜍分泌物接觸皮膚都可能引起反應，包括皮膚紅腫、痕癢、甚至誘發蕁麻疹或者接觸性皮炎。更加要命嘅係，如果唔小心搞到眼入面，可能會導致視力模糊、紅腫、痕癢，嚴重嘅甚至可能永久失明。

內地有啲坊間偏方流傳指蟾蜍可以「清熱解毒」、「治癌」、「抗炎」等等，但醫學專家就狠批，全部都冇科學根據，亦從未有任何專業機構認可佢嘅療效。相反，蟾蜍毒性極強，而且至今都冇針對性解毒藥，萬一中毒後果可以好嚴重。

珠海市疾控中心就事件發出呼籲，提醒民眾切勿亂信偏方，更唔可以擅自食用蟾蜍或者相關製品。蟾蜍毒素毒性強，目前尚無特效解毒藥。如不慎誤食蟾蜍，應立即催吐並盡快就醫。

珠海市市場監督管理局亦發出預警，指市面上唔少餐廳或者小販為咗吸引客人，偷偷炮製「野味菜式」，但強調餐飲單位係嚴禁使用蟾蜍入饌。此外，如果去街市或超市買蛙類食材，都要特別留意，不要將蟾蜍誤當成田雞、牛蛙等可食用蛙類，以免中毒。《I》