美國特朗普喺白宮發表講話，表示可能會畀好多國家關稅減免。市場樂觀情緒升溫，Trump Trade（特朗普概念股）指標特斯拉帶頭飆升，收市升11.9%，報278.39美元，成為全日焦點。美股三大指數齊齊起飛，道指升597點，收報42,583點；標指升1.8%，報5,767點；納指升2.3%，報18,188點。

特朗普概念之一嘅比特幣，24小時滾動升3.8%，暫報86736美元，比特幣概念股急漲，Strategy升10.4%，Coinbase升6.9%。科技股同步上漲，Nvidia升3.2%，Meta升3.7%，Palantir升6.4%。

美國3月製造業PMI初值跌穿50，由52.7跌至49.8，低於預期51.8，服務業PMI初值由51升至54.3，高於預期的51。本周焦點方面，美國周三將公布聯儲局視為通脹指標嘅2月PCE（個人消費支出）物價指數。

特朗普喺24日與團隊開會時表示，早前已對鋼鐵同鋁加徵關稅，下一步就係汽車，話好快會公布。佢又透露，將來有機會針對藥品加稅，強調「一旦爆發戰爭或者發生其他突發狀況，美國一定要有自己嘅供應鏈。」到同日稍後，特朗普喺白宮另一場合再講，連木材同半導體都會納入新一輪關稅清單。

不過喺宣布對新領域徵收關稅嘅同時，特朗普喺同一場活動中表示，佢可能會給予許多國家關稅減免，呢啲減免將於 4 月 2 日生效。當被問及部門關稅是否都將於當天開始徵收時，特朗普最初表示，「係嘅，所有商品都將徵收關稅。」然後佢又話，「但當天唔係所有關稅都包括在內。」仲暗示，對汽車徵收關稅可能會在對等關稅開始實施之前宣布。

喺發表以上貿易言論之前，特朗普仲喺社交平台上宣布，將會對進口委內瑞拉能源產品（包括石油及天然氣）嘅國家徵收「二級關稅」（Secondary Tariff），稅率高達25%。佢警告話，凡係買委內瑞拉能源產品嘅國家，將喺與美國貿易中被罰額外關稅，政策同樣計劃於4月2日正式生效。

呢項舉措明顯係針對委內瑞拉馬杜洛政權，同時亦被解讀為變相向中國施壓。有鑑於中國為委內瑞拉原油嘅最大買家之一，特朗普此舉被視為係對中國嘅最新打擊。《I》