美國針對總統特朗普同科技富豪馬斯克嘅示威潮持續升溫，已經遍佈全國各州，由東岸嘅華盛頓特區，一直蔓延到西岸加州灣區。民眾抗議聲音愈來愈激烈，甚至有激進分子訴諸暴力，針對特斯拉車輛嘅縱火同槍擊事件接連發生。有唔少車主表示，因為馬斯克而對特斯拉產生反感，揸部特斯拉出街會覺得「丟架」，為咗避嫌，唔少人選擇割席賣車。

但喺呢場全國性動盪之中，特朗普同馬斯克就依然如常，近日仲雙雙現身賓夕法尼亞州，喺一場大學摔角比賽同台出現。當時全場歡呼聲震耳欲聾，氣氛如演唱會般熱烈。

「U-S-A！U-S-A！」特朗普入場前，一如以往高調登場，逐一同現場官員同觀眾握手寒暄。而身邊嘅馬斯克亦陪住佢一齊睇比賽，兩人並肩而坐，展現出政治權力同財團資本之間嘅緊密聯繫。

不過，喺會場內氣氛高漲之際，街頭上就截然不同。美國多地持續有示威爆發，由首都華盛頓到三藩市，大批民眾走上街頭，高呼：「馬斯克要落台！」、「唔可以由啲億萬富豪話晒事，決定我哋下一代讀咩書、有冇得享受醫療！」

部分激進示威者認為，和平示威根本無效，索性以暴力行動發洩不滿。據報道，由年初至今，已有9個州錄得針對特斯拉汽車嘅縱火、槍擊或者其他惡意破壞行為，情況愈來愈嚴重。曾經熱愛特斯拉嘅車主，有唔少都紛紛變心。有車主直言：「唔係部車有問題，而係馬斯克最近做嘅嘢，令我覺得開住都羞家。」汽車行業分析師費克斯指出：「咁多負面新聞，對特斯拉品牌嚟講，肯定冇任何好處，反而會進一步削弱公眾信心。」

根據統計，截至今年3月中旬，美國市場上2017年後出產嘅特斯拉車款，佔咗所有換車汰舊比例嘅1.4%，係去年同期超過三倍，顯示越嚟越多車主選擇賣車抽身。就算唔賣車，都有越來越多特斯拉車主喺車身上面貼上「我喺馬斯克發瘋之前買嘅」（I bought my Tesla before Musk went crazy.）或「我反對馬斯克」（I’m against Musk.）等標語避險。

除咗街頭壓力，特斯拉公司本身都麻煩重重。CNN報道指出，特斯拉正面臨潛在嘅進口關稅壓力，最新推出嘅Cybertruck亦傳出車身面板脫落問題，要進行召回處理，導致股價大幅下跌，市場信心動搖。

喺呢個關鍵時刻，特朗普明確表態撐特斯拉。對於針對特斯拉嘅連串暴力事件，美國司法部已經將部分案件列為國內恐怖主義行為。特朗普更發出強硬警告，一旦罪名成立，涉事人士最高可被判囚20年。《I》