內地直播帶貨平台「三隻羊」去年賣「山寨香港品牌」月餅搞到滿城風雨，事件更引發網民群起批評，最終畀官方重罰6,894萬人民幣，當中包括罰款同非法所得。而事隔大半年，今日（23日）合肥市聯合調查組出通報，話三隻羊已完成整改，符合要求，可以恢復經營。

呢單風波要追溯到去年中秋前夕，當時三隻羊喺直播間主打「香港美誠月餅」，仲搵埋香港藝人曾志偉出鏡幫手賣廣告，講到個品牌好似真係來自香港，信心爆棚。不過事後就畀人踢爆：「美誠」根本喺香港無門市、香港買唔到，實情係大陸製造。事件引起極大爭議，最終被當局勒令停業整頓。

根據最新通報，三隻羊公司已經足額繳清全部罰款，總額為6,894萬人民幣。至於涉事產品，包括「香港美誠月餅」同「澳洲穀飼牛肉卷」，三隻羊亦陸續向消費者賠償共2,777.85萬元。當局表示，三隻羊承諾會繼續跟住「應賠盡賠」原則執行，根據內地消費者法例，以「退一賠三」標準安排退貨賠款，保障消費者權益。

三隻羊上次出事，除咗產品標籤唔清楚之外，直播時嘅言論、主播行為、售後處理等方面都有唔少問題。調查組指，已經指導佢哋制定咗89項整改措施，包括商品選品、質量把關、廣告宣傳、退貨退款、公司內部管理等等。

另外，官方亦要求三隻羊深刻反省過去直播中出現嘅不當行為，要真正落實網絡文明規範，對直播主持人同帶貨活動加強監管，提高社會責任感，樹立正面形象，唔好再靠「扮香港」、「玩混淆」嚟賺快錢。

經三隻羊公司提出申請，合肥市聯合調查組召集咗政府部門、律師同消費者代表，對佢哋整改情況作出全面評估，最後一致認為佢哋已達標準，可以復業。調查組強調，未來會堅持「一手監管，一手發展」方針，建立長效監管制度，唔單止要加強執法力度，仲會優化監察方法，推動平台企業守規矩、有秩序咁發展，提升產品質素，維護市場公平同消費者權益。《I》