根據美國《Politico》喺星期二（3月18日）獨家報導，有三名烏克蘭議員同一位美國共和黨外交政策專家透露，四位同美國總統特朗普關係密切嘅美方代表，近期喺秘密情況下，同烏克蘭反對派人士進行咗一場極具政治含義嘅會面。

消息指，呢場閉門會議，烏克蘭方面參與者包括前總理季莫申科，同埋前總統波羅申科所屬政黨嘅高層。而美方就派出咗特朗普長子小唐納．特朗普、女婿庫許納、右派媒體名嘴卡爾森，以及現任白宮中東問題特使威特科夫，全班人都係特朗普親信級人馬。雙方傾談焦點，正正就係探討烏克蘭可唔可以盡快舉行選舉，意圖令澤連斯基下台。

據悉，美方代表認為，戰爭令到烏克蘭民心倦怠，加上經濟困局，如果即時搞總統大選，澤連斯基好大機會輸。所以佢哋透過與反對派接觸，表達美國唔止得澤連斯基一個「夥伴」，實際係喺用「影子外交」手法削弱澤連斯基政治地位，向佢施壓，逼佢聽話。一名唔願具名嘅共和黨外交顧問直言：「特朗普團隊視澤連斯基為一個阻礙，想逼佢讓步，方法之一就係擺明美國仲有其他合作對象。」

澤連斯基喺3月12日就已經公開講明，烏克蘭總統大選會等戰爭結束、戰時狀態解除之後先舉行，強調政府冇人想刻意拖延選舉程序。而根據英國民調機構 Survation 嘅最新調查，雖然澤連斯基支持率有少少回落，但最近佢同特朗普公開對撼反而刺激咗民意支持。數據顯示，有44%受訪者表示會喺下屆選舉支持澤連斯基，排第二係烏軍前總司令扎盧日尼（21%），第三係波羅申科（10%），而季莫申科得6%。

幾周來，美國總統同烏克蘭領導人之間嘅氣氛一直緊張。雙方矛盾最終喺2月28日爆發。當日特朗普與澤連斯基進行咗一場全球直播嘅會談，原本預期會簽署《烏克蘭—美國礦產資源協議》，點知全程火藥味十足，甚至失控收場。

現場除咗特朗普之外，美國副總統萬斯都全程發難，言語不留情，幾次喺澤連斯基發言期間打斷佢，更高聲喝止，指責佢唔合作、不尊重盟友、唔識做總統。整個會談成為史上第一次有美國總統當住鏡頭鬧爆外國領袖，甚至將澤連斯基趕出白宮。會談破裂後，特朗普政府即時中止對烏克蘭所有軍事援助。

事件發生之後，歐洲多個國家即時表態支持澤連斯基，包括法國總統馬克龍、德國總理及北歐國家領袖都發聲明，暗批特朗普態度「破壞同盟互信」。相反，俄羅斯方面就非常開心，外交部發言人即時出嚟話：「烏克蘭同美國矛盾爆發，係遲早嘅事。」更指澤連斯基「根本唔再代表烏克蘭主流聲音」。

至於美國國內反應，就一如以往般兩極化。共和黨陣營大讚特朗普夠硬淨、敢言、唔俾人呃錢；民主黨則鬧爆佢破壞外交慣例，將盟友推向絕境。《I》