香港首富李嘉誠旗下「長江和記」公司日前宣佈，以近190億美元將旗下43個港口，包括巴拿馬運河入口兩個重要港口出售畀美國財團。消息一出，北京即刻跳腳，官媒連續多日重炮攻擊，港澳辦同中聯辦更罕見轉載《大公報》文章，「借他人之口」指責該公司損害中國利益，指是次交易係「無腰骨的跪低」，「見利忘義」、「漠視國家利益」，「背叛和出賣全體中國人」。

今（18日）特首李家超喺行會前被記者圍住追問睇法，佢講咗三點意見。第一指社會有很多議論，反映社會對事件關切，值得重視；第二係政府一直要求外國政府為包括香港企業提供公平公正環境，反對喺國際經貿關係使用脅迫或施壓手段；第三係必須符合法律及規則要求，特區會依法依規處理。

記者即刻追問所謂「依法依規」係咪包括《港區國安法》，李家超冇正面回應，只係不斷重覆：「特區會依法依規處理。」

由移英香港傳媒人創立嘅網媒《綠豆》昨日更爆出猛料，指長和主席兼全國政協委員李澤鉅喺公司宣布交易當日，正身處北京出席兩會，期間被「正國級」（國家級正職）領導人召見。

前特首梁振英亦發文加入戰團。梁振英發文稱：「也許香港被外國管治太久了，有些香港商人誤信『商人無祖國』，以為一切『在商言商』。」佢仲話，英治時期香港商人要向英國經濟貢獻，依家美國打壓TikTok同中國企業，好明顯係扶持自家企業，認為「沒有祖國的商人只會淪為沒有父母被人欺凌的孩子。」

今次收購案係由美國資產管理巨頭「貝萊德」（BlackRock，又稱黑石集團）牽頭嘅財團，長和出售嘅資產並唔包括中國同香港嘅港口。據悉，長和創辦人李嘉誠同主席李澤鉅親自參與談判，美國總統特朗普亦公開讚賞呢單收購，話呢一步係為美國政府「收回」巴拿馬運河控制權邁出重要一步。

長和集團自1997年開始一直持有巴拿馬克里斯托瓦爾（Cristobal）同巴爾博亞（Balboa）兩個戰略港口嘅經營權，而家就決定轉手賣俾以「貝萊德」為首嘅美資財團。

根據初步協議，該財團會取得Hutchison Ports PPC公司90%股權，同時仲取得另一間擁有大量海外港口嘅子公司80%股權。對此，長和高管西克斯（Franck Sixt）喺今個月初強調呢筆交易完全係商業性質，並指交易同近期有關巴拿馬港嘅政治報道完全無關。

根據公開資料顯示，「長江和記實業有限公司」係香港最具規模嘅跨國企業之一，1950年由李嘉誠一手創立，至今仍然由李嘉誠家族牢牢掌控。業務版圖橫跨金融、零售、基建、電信、港口、物流等多個領域。《I》