近期美加關係時有波折，加拿大一向以溫文儒雅、友善待人見稱，但近日卻因為美國總統特朗普決定向加拿大加徵關稅，令唔少加拿大人怒火中燒。面對呢場貿易戰，有加拿大喜劇演員提出一個「核武級」嘅反擊方案——封鎖美國人瀏覽全球最受歡迎嘅成人網站Pornhub。

加拿大喜劇演員普日茨基（Matthew Puzhitsky）喺Instagram上開玩笑表示：「如果加拿大封鎖美國訪問Pornhub，咁我哋就贏咗貿易戰，簡單直接，冇得輸！」普日茨基認為，對於習慣自由上網嘅美國人嚟講，一旦無法再瀏覽呢個全球最大成人網站，肯定會造成極大影響。

Pornhub嘅母公司Aylo總部設於加拿大蒙特婁，而該網站亦係美國最多人瀏覽嘅網站之一，每月吸引超過3,000萬美國訪客。如果加拿大真係唔俾美國人睇Pornhub，可能真係會掀起軒然大波。

普日茨基嘅搞笑言論迅速喺網絡上發酵，更獲《紐約郵報》（New York Post）同《每日郵報》（Daily Mail）等媒體報導。唔少美國網民見狀，立即炸鍋。有嚟自曼哈頓嘅用戶更半開玩笑咁話：「如果佢哋真係封鎖Pornhub，我即刻收拾行李搬走移民！」

但其實，Pornhub早前已經因為美國部分州份通過咗嚴格嘅身份認證法規，而自行封鎖咗包括德州、佛州喺內嘅17個州份，令當地用戶無法瀏覽該網站。呢啲州份多數由保守派政黨控制，並受到福音派基督徒嘅影響，要求用戶必須提交身份證明文件先至可以瀏覽成人網站。但Pornhub方面表示，為保障用戶私隱，寧願選擇直接封鎖呢啲地區。

特朗普針對加拿大嘅報復性關稅將於4月2日正式生效。屆時，加拿大出口到美國嘅鋼鋁產品將面臨更高關稅，嚴重影響兩國供應鏈。作為反制，加拿大安大略省省長福特（Doug Ford）原本計劃向出口至美國嘅電力徵收25%附加費，不過隨後喺貿易談判前宣布暫緩該措施。

目前，美加貿易戰未來發展仲未明朗。但無論如何，呢項提案已經為呢場貿易爭端增添咗一絲幽默色彩。究竟特朗普會點樣回應呢？美國人又會唔會為咗繼續「上網」，向政府施壓停止貿易戰？大家不妨拭目以待！《I》