以色列喺當地時間18日凌晨再度發動猛烈空襲，目標直指加沙地區，造成至少200人喪命，傷亡人數仲持續上升。據美國白宮透露，以色列事前已經向美方作簡報，而美國國家安全會議發言人休斯（Brian Hughes）更公開表示：「哈馬斯本來可以選擇釋放人質，以換取延長停火，但佢哋選擇拒絕，令戰爭繼續。」與此同時，以色列軍方亦放風，暗示地面部隊隨時可能重新進入加沙。

是次攻勢由以色列總理內塔尼亞胡（Benjamin Netanyahu）及國防部長卡茲（Israel Katz）拍板，至今已經對加沙發動數十次空襲，當地北部、中部、南部多區都成為襲擊目標，死亡人數突破200，其中包括大量兒童。

以色列軍方聲稱，佢哋發現哈馬斯正準備重新武裝，計劃對以色列發動新一輪攻擊，因此決定先發制人，將今次轟炸鎖定哈馬斯指揮官、政治局成員以及關鍵基礎設施。據巴勒斯坦方面消息，死者之中包括哈馬斯高級安全官員瓦特法（Mahmoud Abu Watfa）。

以軍表明，未來一旦有需要，佢哋會持續發動空襲，而行動亦隨時可能擴大，不排除地面部隊會再次進入加沙進行軍事行動。目前，以軍已經完成所有戰線部署，防空警戒亦全面提升。

針對今次以色列對加沙嘅最新攻勢，美國白宮新聞秘書李威特（Karoline Leavitt）表示，以色列事前曾經同美國溝通，並獲得特朗普支持。李威特引用特朗普總統講過嘅話：「哈馬斯、胡塞、伊朗，所有試圖恐嚇以色列同美國嘅勢力，都會付出沉重代價，地獄之門將為佢哋打開。」《I》