委內瑞拉黑幫「阿拉瓜火車」（Tren de Aragua）成員一直以窮凶極惡聞名，殺人不眨眼，犯案無數。但近日，當佢哋搭乘美國驅逐嘅航班抵達薩爾瓦多時，卻個個腳震、面容扭曲，甚至當場喊晒，因為佢哋知道，等待自己嘅將係全球最恐怖嘅監獄——「反恐怖主義監禁中心」（CECOT）。

特朗普引用戰時法律遣送黑幫

美國總統特朗普援引1798年嘅「外國敵人法」（Alien Enemies Act），以加快遣返委內瑞拉黑幫成員。呢項決定引起爭議，不過，薩爾瓦多總統布克爾（Nayib Bukele）今日證實，美國已經將200多名委內瑞拉幫派成員驅逐至薩爾瓦多，並關押喺當地最高戒備監獄。

阿拉瓜火車係一個橫跨多國嘅犯罪組織，涉及綁架、勒索、販毒、組織犯罪同僱傭殺人等罪行。特朗普政府上個月正式將該組織列為「外國恐怖組織」，並展開大規模遣返行動。

布克爾宣布，阿拉瓜火車黑幫嘅238名成員已經抵達薩爾瓦多，將會被關押喺「反恐怖主義監禁中心」，呢座監獄可以收容最多4萬名囚犯，專門用嚟囚禁殺人犯、販毒集團成員同黑幫分子。

布克爾公開一段片段，畫面顯示大批黑幫成員戴上手銬同腳鐐，喺特種部隊押送下，由飛機轉移至重裝甲車隊。薩爾瓦多政府亦分享咗多張相片，顯示黑幫成員喺抵達監獄後即時被剃光頭同鬍鬚，全部換上白色囚衣，被押送入監。

布克爾表示，美國將會向薩爾瓦多支付「極低廉費用」，作為羈押呢批黑幫成員嘅補償，但佢冇透露具體金額。

美法院頒臨時禁制令 但特朗普堅持行動

華盛頓聯邦法院早前頒布一項為期14日嘅臨時禁制令，認為特朗普政府引用嘅「外國敵人法」應該只適用於美國與某國處於「敵對行為等同戰爭」嘅情況。不過，特朗普政府無視呢項裁決，繼續執行遣返計劃，引發外界質疑美方是否刻意違抗法院命令。

對於法官裁決暫停遣返行動，布克爾喺社交媒體發文，簡單一句：「哎呀…太遲啦」，仲配上一個哭笑不得嘅表情符號，疑似冷嘲美國法院想阻止遣返行動但已經無法挽回。

美國白宮發言人李威特（Karoline Leavitt）否認特朗普政府無視法院命令，佢表示，被遣返者已經離開美國，並強調地方法官無權阻止美國政府將外國恐怖分子驅逐出境。

多個民權團體警告，如果法院最終支持特朗普援引「外國敵人法」，將會導致美國可以喺冇解釋、冇法庭聽證情況下，大規模驅逐成年移民，引發憲法爭議。

監獄堪稱「人間煉獄」

薩爾瓦多「反恐怖主義監禁中心」自2023年啟用後，一直被外界形容為「全球最恐怖監獄」。該監獄保安級別極高，獄警同士兵全部蒙面執勤，以防止將來遭黑幫報復。監獄內規矩極為嚴格，囚犯被完全隔絕，連同家人聯絡嘅權利都冇，監獄內亦冇手機訊號。

監獄內冇床墊、冇枕頭，監房內燈光24小時開放，每個監房擠滿100名囚犯，全部人統一穿上白色T恤，剃光頭，手腳戴上鐵鏈。房內只有「金屬床架」同一個「開放式廁所」，食物亦僅提供最基本營養，每餐都係豆類、芝士同米飯嘅混合物，冇肉類，囚犯只能用手進食，因為獄方唔允許任何刀叉。

獄方明言，呢啲囚犯基本上「冇可能出獄」，每日只有半小時可以離開監房，進行團體運動或者讀聖經。獄方強調「安全同控制比人權重要」，任何違規行為都會受到極端嚴厲懲罰。《I》