因應俄羅斯總統普京拒絕接受美國同烏克蘭提出嘅停火方案，美國總統特朗普決定加碼制裁，直接下令切斷俄羅斯向歐盟銷售石油嘅所有渠道，並對所有購買俄羅斯石油嘅國家同個體實施懲罰性措施。《路透社》披露，面對美國制裁風險，中國多間國企已經開始撤退，其中中石化等大型國有能源企業已經暫停購買俄羅斯石油，以免成為制裁目標。
俄羅斯供應商觀望 中企「暫停睇定先」
據《路透社》獨家報道，多名貿易消息人士透露，近期俄羅斯出口到中國同印度嘅石油量有所上升，因為有一批不受美國制裁影響嘅運油船參與運輸。不過，部分中國國企為咗降低風險，開始暫停進口。
報道指出，中國石化集團同振華石油最近已經開始重新評估美國新一輪對俄羅斯制裁可能帶嚟嘅風險，並決定自本月起暫停購買俄羅斯石油。另外，最少兩間中國進口商亦已縮減俄油採購量。
其中一間總部設喺北京嘅國企高層透露，佢哋公司內部正進行合規審查，並決定等美俄就俄烏戰爭達成新協議前，暫停同俄羅斯石油供應商交易。該名消息人士補充，如果未來美國選擇放寬或者撤銷對俄羅斯石油出口嘅限制，公司會考慮恢復購買俄油。
一名與中國國企買家關係密切嘅俄羅斯貿易高層向《路透社》表示，現在中國企業正避開受到新制裁嘅俄羅斯石油供應商：「佢哋而家先暫停一下，同時評估有冇辦法繞過新制裁。」
對於《路透社》查詢中國石化集團、振華石油、俄羅斯天然氣工業石油公司同蘇古特石油天然氣股份公司，四間公司都拒絕回應。
中國長期依賴俄油 現時佔進口量兩成
報道直言，自從俄烏戰爭爆發以嚟，歐美多國不斷加強對俄羅斯石油收入嘅壓制，但中國國企一直係俄羅斯石油嘅主要客戶之一。
數據顯示，俄羅斯天然氣工業石油公司同蘇古特石油天然氣股份公司每個月向中國出口約120萬噸石油，即每日30萬桶，當中有一半係賣比中國國企，另一半則由獨立煉油商購入。截至目前，俄羅斯仍然係中國最大嘅石油供應國，佔中國原油進口總量約20%。
值得留意嘅係，就喺《路透社》披露中國國企暫停購買俄油之前，美國財政部已經喺3月12日宣布，終止對俄羅斯部分銀行嘅60日制裁豁免權。
呢項豁免原本允許受制裁嘅俄羅斯銀行，包括俄羅斯中央銀行、俄羅斯外貿銀行同阿爾法銀行，繼續處理歐洲國家支付俄油款項。隨住特朗普政府取消豁免，歐洲部分國家如匈牙利同斯洛伐克將無法再透過該渠道購買俄羅斯石油，進一步壓縮俄油嘅國際市場。
共和黨：對俄最徹底制裁
有共和黨議員指，特朗普下令全面封殺俄羅斯對歐盟嘅石油銷售渠道，並對所有購買俄油嘅國家同個體實施制裁，呢項措施可謂「對俄羅斯最徹底嘅制裁」，目的係迫使普京政府讓步，接受美烏停火協議。
值得關注嘅係，上週五（3月14日），七國集團（G7）外長喺加拿大魁北克省舉行會議後發表聯合聲明，呼籲俄羅斯接受美國提出嘅停火方案，並警告如果普京當局拒絕，俄羅斯將會面臨新一輪國際制裁。《I》
