今年係中國同歐盟建交50週年，為咗標誌呢個重要時刻並討好中國，歐盟原本計劃邀請中國國家主席習近平親自到布魯塞爾出席中歐峰會。不過，《金融時報》報道指，習近平拒絕呢個邀請，中方仍會按照慣例，由國務院總理李強代表出席。

據報道，消息來自兩名知情人士，佢哋透露李強將會喺布魯塞爾會見歐洲理事會主席柯斯塔（Antonio Costa）同歐盟委員會主席馮德萊恩（Ursula von der Leyen）。

根據傳統，中歐峰會輪流喺布魯塞爾同北京舉行，而中國方面一般都係由國務院總理出席歐洲場，而國家主席則會出席喺北京舉辦嘅會議。不過，由於今年正值中歐建交50週年，歐盟希望習近平親自出席，以示重視，但目前未獲中方正面回應。

消息人士指，中歐雙方仍然就邀請習近平赴布魯塞爾進行磋商，但歐方遇到冷處理，反映咗歐盟內部部分觀點——即使美國總統特朗普咁積極打擊多邊世界秩序，中國除咗喺口頭上講合作，並冇實質行動。

對於外界關注習近平會唔會出席中歐峰會，中國外交部僅回應冇可提供嘅任何資訊。而一名歐盟官員則透露，關於今年峰會嘅確實日期同代表級別，雙方仍然進行非正式討論。

今次中歐峰會正值中歐關係格外敏感嘅時刻。自從2022年俄羅斯入侵烏克蘭之後，歐盟對中國態度轉趨強硬，並多次指控中國暗中支持俄羅斯。此外，歐盟亦因中國電動車獲得政府補貼而對其加徵關稅，令雙方經貿關係進一步緊張。

一名歐盟高級外交官形容，中歐關係現時陷入僵局，並表示：「中國對歐洲嘅政策，只係語氣上有變化，實質上冇任何改變。同樣，歐盟對中國嘅政策亦冇變。」

中國政府現任歐洲事務特別代表盧沙野一向以「戰狼外交」聞名，佢近日聲稱，中國對歐洲嘅政策始終係「和平、友誼、合作、互利」。

外界分析，盧沙野獲委任為特別代表，代表中國對歐立場日趨強硬。不過，亦有歐盟外交官認為，中方正試圖展開「魅力攻勢」，希望歐洲可以喺俄烏戰爭嘅和平談判中扮演角色。該名外交官透露，目前關於歐盟同中國之間貿易摩擦嘅討論比以往少咗：「爭議仍然存在，但關注程度減少咗。」《I》