南韓男星金秀賢近日捲入爭議，同已故女星金賽綸過往戀情被揭發。金秀賢所屬經紀公司 Gold Medalist 原定下周公布證據反擊，但今（14日）突發長篇聲明，承認同金賽綸曾有戀情，並強調雙方交往時，女方已經成年。

金賽綸早前離世，YouTube 頻道《橫豎研究所》連日爆料，指 2015 年時，27 歲嘅金秀賢同 15 歲嘅金賽綸秘戀，關係維持六年，令外界質疑其涉及誘拐未成年少女。更有傳言指，金秀賢要求金賽綸償還 7 億韓圜債務，成為壓垮女方嘅最後一根稻草，導致佢於金秀賢生日當天自殺。

Gold Medalist 於聲明中表示：「今日凌晨，金秀賢先生情緒極度不安，公司已介入確保佢嘅狀態穩定。」並指由於金秀賢長期承受心理壓力，公司決定公開聲明澄清爭議。

聲明指出：「關於金秀賢先生同金賽綸小姐於未成年時交往嘅說法並唔屬實。金賽綸小姐於 2024 年 3 月 24 日喺 IG 限時動態公開嘅相片，同 2025 年 3 月 11 日節目《橫豎研究所》公開嘅相片，實際上均攝於 2020 年冬天，當時二人處於交往關係。」此外，聲明亦提及：「2025 年 3 月 12 日《橫豎研究所》公開嘅另一張相片，實際上係 2019 年 12 月 24 日平安夜時二人拍攝嘅。」

針對服兵役期間寄俾金賽綸嘅信件，公司否認屬「情書」，並表示：「呢封信只係金秀賢寄俾親近朋友嘅信件之一，信件內容主要描述軍旅生活。『想念』等字眼僅為服役軍人之間常見用語，並無特殊含義。」至於金賽綸社交媒體上使用嘅愛稱，公司澄清：「該暱稱自 2016 年起，金賽綸小姐已經公開使用，並非二人之間嘅專屬愛稱。」

針對金秀賢冷待金賽綸經濟問題嘅指控，經紀公司表示：「當時 Gold Medalist 已經協助金賽綸小姐償還所有佢無法獨立承擔嘅債務，包括因酒駕事件所產生嘅違約金同賠償。」聲明稱：「事故導致嘅違約金總額約 11 億 1400 萬韓圜，公司努力降低賠償金額，最終剩餘 7 億韓圜，當中包括出售金賽綸因事故受損嘅車輛，部分收益用於賠償。然而，《橫豎研究所》聲稱公司『奪走』金賽綸嘅車輛，實屬扭曲事實。」

有網民質疑，Gold Medalist強調所謂「存證信函」純粹係走程序，無意真正追討欠款，但金賽綸家屬卻透露，公司已經搵來三大王牌律師團隊去處理呢筆債務，而催款信函亦正正由呢三位大律師發出。既然公司口口聲聲話「走個形式」，點解又要砸大錢請律師發信？

根據金賽綸家屬嘅說法，Gold Medalist喺距離協議還款期限仍有9個月嘅情況下，突然發出存證信函，要求金賽綸「即時償還約7億韓圜」。金賽綸見到信件後當場「渾身發抖」，自知根本無能力負擔。事到如今，公司卻改口話存證信函只係「形式」，但對比當時咁強硬嘅催債手法，根本自相矛盾。

最後，Gold Medalist 表示：「《橫豎研究所》公開嘅相片雖然屬實，但唔代表該節目嘅所有主張都係真相。佢哋刻意刪減背景脈絡，導致事實被曲解。我哋接受大眾對金秀賢先生嘅關注同批評，但無法容忍唔實指控同人身攻擊。」

而爆料者《橫豎研究所》昨日（13日）再爆出多一張金秀賢與金賽綸的面貼面合照，頻道負責人警告金秀賢喺記招上好好說話，揚言如果金秀賢下周「胡言亂語」，會公布「男子喺女友屋企裸體洗碗」嘅相片。《I》