葡萄牙近日表態，決定唔會用美製 F-35 戰機取代現役 F-16，更直言同美國總統特朗普有關，成為全球首個因特朗普外交政策而放棄潛在軍購大單嘅案例。

葡萄牙空軍原本建議政府購入美國洛歇馬丁（Lockheed Martin）生產嘅 F-35 戰機，但卸任在即嘅國防部長梅路（Nuno Melo）接受葡萄牙媒體《Público》訪問時強調：「我哋喺作出決定時，唔可以忽視地緣政治環境。美國近期喺北約嘅立場，令我哋必須重新思考最佳選擇。盟友嘅可預測性係一個極其重要嘅考量因素。」

特朗普近來頻頻發表爭議言論，包括重提要吞併格陵蘭同威脅加拿大，引發外界對美國政策穩定性嘅擔憂。部分歐洲國家開始憂慮，如果華府因外交政策轉變而對盟友採取強硬手段，可能會封鎖 F-35 必需嘅軟件更新同零件供應，令戰機無法正常運作。

梅路進一步指出：「世界已經變咗，而美國作為盟友，可能會對 F-35 嘅使用、維修、零件同整體運作造成限制，令我哋無法喺所有軍事場景中靈活部署戰機。」佢強調：「現時有多個選項值得考慮，特別係歐洲自主生產嘅軍機方案。」

相比之下，荷蘭國防部長布雷克爾曼斯（Ruben Brekelmans）本周稍早前表示，荷蘭將繼續履行已簽訂嘅 F-35 軍購合約，唔會因美國外交政策變動而改變計劃。不過，葡萄牙政府仍未正式簽約，因此有更大靈活性考慮其他方案。

葡萄牙目前正因為中間偏右政府垮台而準備提前大選，國內政治變數亦為軍購決策增添更多不確定性。最終政府會否堅持拒絕 F-35，抑或會因新政府上場而改變立場，仍然有待觀察。《I》