美國參議院民主黨領袖舒默（Chuck Schumer）喺13號表態，願支持由共和黨提出嘅臨時撥款法案，以免聯邦政府因撥款問題停擺。舒默強調，一旦政府停擺，特朗普同馬斯克將可以更加為所欲為。

根據參議院規則，法案要通過必須獲得至少8名民主黨參議員支持。消息指，舒默喺一次閉門午餐會上，私下向民主黨議員表明態度，並於周五正式公開表態，承認共和黨呢條法案「十分離譜」，但政府停擺影響更大，可能令特朗普同馬斯克更肆無忌憚。

眾議院喺本周二已通過呢條由共和黨提出嘅臨時撥款議案，將政府經費延長至9月30日，維持2024財年支出水平，當中涉及多項重大變更，例如削減130億美元非國防開支、增加60億美元軍費、額外撥款俾邊境執法，甚至進一步削減國稅局執法資金。

民主黨方面強烈反對，認為法案充滿共和黨嘅「政治私貨」，其中最受爭議嘅條款之一，係限制國會阻止特朗普濫用緊急經濟權施加關稅嘅權力。民主黨仲指，法案如果通過，特朗普政府可以挪用本來用嚟打擊芬太尼走私嘅資金，轉作大規模遣返移民之用。但由於眾議院通過法案後宣布休會離開，參議院冇得修改內容，只可以選擇全盤通過或直接否決。

如果法案喺15日前無法獲得通過，聯邦政府將正式「關門」，超過200萬名政府員工可能要被迫無薪放假，影響唔止基層公務員生計，仲會波及數百萬美國市民日常生活，而民主黨亦可能因此面臨政治壓力。

另外，一旦政府停擺，白宮權力將進一步擴大。民主黨參議員希肯盧珀（John Hickenlooper）警告：「政府停擺，總統權力會更大，佢可以自行決定邊啲部門開放、邊啲要關閉，資金點樣分配。呢種局面，基本上會變成『皇帝』話事！」

美國廣播公司新聞網（ABC News）指出，舒默對政府停擺風險極為憂慮。佢直言，特朗普與馬斯克一向主張削減聯邦政府機構，特別係對監管科技、環保同金融市場嘅機構最感興趣，政府停擺將為佢哋提供最佳藉口，令大規模裁員變得更加合理。

民主黨內部對舒默讓步存在一定爭議，部分進步派議員認為，應該強硬反對共和黨版撥款法案，而唔係妥協。不過，舒默陣營則認為，特朗普陣營早已準備好喺政府停擺期間大做文章，一旦聯邦政府陷入停擺，特朗普將可以將責任推卸到民主黨身上，甚至以「重整政府」為由推動更極端嘅政策。《I》