面對中國汽車大舉進攻市場、低價傾銷，俄羅斯政府終於出手應對。據英國《金融時報》報道，莫斯科由今年1月起大幅調高汽車進口關稅，希望減低中國車對本土製造業嘅衝擊，防止俄國汽車工業被徹底吞噬。

俄烏戰爭後中國車迅速填補市場空缺

自俄烏戰爭爆發以嚟，西方車企因應制裁撤離俄國市場，令當地汽車市場出現巨大缺口。而中國車廠趁機加快輸出，迅速填補空白，成功搶佔俄羅斯市場主導地位。

同時，由於美國、歐盟、加拿大等國陸續向中國汽車徵收反傾銷關稅，令中國車企外銷受阻，俄羅斯遂成為中國車出口嘅重要目標。

呢股潮流令中國汽車喺俄羅斯嘅銷量急升。據中國乘用車協會數據顯示，2023年俄國共購入超過100萬輛中國車，令中國品牌喺當地嘅市佔率飆升至63%，相比之下，俄羅斯本土品牌嘅市場份額則跌至僅剩29%。

俄政府出手 提高關稅阻中國車氾濫

面對中國汽車壟斷市場嘅趨勢，俄羅斯政府決定出手應對。今年1月，俄方大幅提高類似進口關稅嘅「汽車回收費」，單車收費增至約7500美元（約58,500港元），比舊年9月激增兩倍以上。俄政府更計劃將該關稅每年增加10%至20%，並持續至2030年，以限制中國車進一步擴張。

俄羅斯並唔係全球首個對中國汽車實施限制嘅國家。過去一年，除咗歐美同加拿大外，同中國友好嘅巴西、泰國同巴基斯坦等新興市場都相繼對中國電動車展開反傾銷調查，並採取高關稅等保護措施，以防本土市場遭中國車業大舉侵蝕。

俄工貿部長：中國車滲透太快 根本唔合規

據俄羅斯塔斯社（TASS）報道，俄國工業貿易部長阿里漢諾夫（Anton Alikhanov）日前喺政府會議上直言，部分中國品牌嘅進口貨車嚴重不符俄國法規，根本唔應該喺當地道路上行駛，但報道未有透露涉及嘅中國車企名稱。

阿里漢諾夫強調，中國車企正積極滲透俄國市場，市佔率屢創新高，對俄國本土車業造成極大壓力。佢指出，俄方雖然已經透過調整回收費等措施嚟試圖應對，但力度仍然唔足，當局需進一步收緊監管，特別係加強對量產車型嘅合規審查，以免中國車企繼續憑低價戰略壓倒本土品牌。