英國內政部喺週三（5日）表示，已決定未來BNO（英國國民（海外）護照）持有人去英國將毋須再申請電子旅行授權（ETA）。內政部會盡快修改相關法例，令新措施盡早生效。

英國內政部移民及公民事務國務大臣馬可特拉（Seema Malhotra）喺回覆上議院議員奧爾頓勳爵（David Alton）嘅信中解釋，自1月5號起，任何冇英國公民或英國移民身份嘅BNO持有人，入境英國前必須申請ETA。不過，內政部經過持續檢討同聽取各方意見後，決定豁免BNO持有人嘅ETA要求。馬可特拉強調，英國政府推出ETA制度，目的係為咗提前篩查入境人士，阻截可能對英國構成威脅嘅人入境，係一項加強邊境安全嘅措施。

不過當局考慮到BNO持有人同英國嘅深厚聯繫、英國對BNO群體嘅歷史承諾，加上BNO護照本身係英國發出嘅旅行證件，所以決定豁免相關人士嘅ETA申請。佢又表示，內政部會盡快修訂相關入境條例，並且定期檢討政策嘅實施情況，防止措施被濫用。英國內政部強調呢項決定係考慮到英國同BNO社群嘅特殊聯繫而作出，惟目前未有公佈具體嘅實施日期。

自今年1月8日起，英國已經正式推行新嘅入境要求，所有旅客，包括免簽證國家人士，都要事先申請電子旅行授權（ETA），只有英國國民同已經獲准居留英國嘅人士可以豁免。ETA嘅申請費用為10鎊，申請人需要上載護照資料同證件相，約3個工作天內會有結果。至於曾經被判監12個月或以上嘅人士，ETA申請會直接被拒。呢項政策可能影響到因為2019年反修例事件而入獄嘅BNO持有人申請赴英，對此馬可特拉未有作出具體回應。

早前推動有關修訂嘅移英港人組織「蘇格蘭香港人」創辦人郭子健喺Facebook發文，感謝英國政府作出呢項決定，並表示會繼續留意政策嘅落實情況，包括BNO持有人入境時，會唔會因為技術或其他原因而受阻。

BNO身份最初係因為1984年中英簽署《中英聯合聲明》而產生，當時英國同意喺1997年香港主權移交後，香港居民將唔再享有英國屬土公民身份及居留權。但為保留同香港居民嘅聯繫，英國提供咗BNO嘅身份供港人登記，令符合資格嘅人士繼續同英國保持一定關係。

2020年，因應中國違反聯合聲明、損害香港嘅自治同自由，英國政府宣布由2021年1月起，符合申請BNO嘅港人同佢哋嘅家屬，可以前往英國生活、工作或讀書。居住滿5年後可申請永久居留權（ILR），再居住多12個月後，就可以申請入籍英國，取得完整公民身份。《I》