俄羅斯2022年2月全面入侵烏克蘭後，大約有24萬烏克蘭人為咗避戰禍，逃到美國，並且獲得臨時合法居留身份。不過美國總統特朗普星期四（6日）突然話，佢會盡快決定係咪取消呢班烏克蘭難民嘅合法居留權。

如果特朗普真係決定取消呢個合法地位，就會完全推翻前總統拜登政府對烏克蘭難民嘅歡迎政策，令到呢班人可能即將面對被美國驅逐嘅危機。

特朗普星期四喺白宮回應傳媒提問嘅時候話：「我哋無打算去傷害任何人，絕對唔係咁嘅意思，我會好認真考慮呢件事。」佢又補充，取消烏克蘭難民合法身份，「有人覺得好合適，但都有唔少人唔同意，我會盡快做出決定。」

路透社引述特朗普政府一名官員同埋三位消息人士透露，如果真係決定撤銷烏克蘭難民嘅臨時居留權，會係特朗普政府一個大型計劃嘅一部分，最終可能撤銷180萬名難民嘅合法居留資格。拜登政府任內曾經推行一系列嘅人道假釋計劃，令非法入境美國嘅難民可以臨時合法留低。

據消息人士表示，特朗普政府最快今年4月就可能取消烏克蘭難民嘅合法居留資格。佢哋話，呢項政策早喺特朗普同烏克蘭總統澤連斯基上星期公開互罵之前，就已經開始計劃。

特朗普喺1月20號就職當日簽署咗幾項總統行政命令，其中一條就係要求國土安全部終止所有分類嘅假釋計劃。特朗普政府亦計劃最快喺本月內取消包括來自古巴、海地、尼加拉瓜同委內瑞拉合共53萬名非法入境移民嘅假釋資格。

路透社指出，一旦取消呢啲假釋資格，相關嘅非法移民將可能被快速驅逐出境。特朗普政府喺上個月已經暫停處理根據拜登政府假釋計劃入境美國嘅移民續期申請，令到唔少家庭陷入困境。

其中一個例子係來自烏克蘭嘅艾維提西安（Liana Avetisian）一家。艾維提西安本來喺烏克蘭做地產，佢同丈夫同埋14歲個女舊年5月逃到美國，最終喺愛荷華州嘅小鎮置業安頓落嚟。目前艾維提西安喺當地負責裝窗，佢丈夫就喺地盤工作，但佢哋嘅工作許可證喺今年5月就會到期。

艾維提西安透露，佢哋一家人已經花費4000美元申請費，希望續期假釋，同時申請另一個「臨時保護身份」嘅計劃。不過而家特朗普政府態度突變，佢非常擔心全家嘅前途：「我哋真係唔知可以去邊度。」

喺美國嘅烏克蘭難民，好多人已經冇晒屋企返，甚至連自己家鄉成個城市都被夷平。烏克蘭婦女艾維提西安接受訪問嘅時候感嘆：「好多烏克蘭人已經冇咗個家鄉，成個城市畀人炸平咗，要遣返佢哋返去？返去邊度呢？根本已經無地方可去！」《I》