美國總統特朗普日前下令向中國加徵關稅，中國外交部發言人林劍喺4日作出強硬回應，表示無論係貿易戰定係其他形式嘅戰爭，中方將「奉陪到底」。不過林劍昨（6日）突然態度大轉變，向華府溫情喊話，表示「無論是關稅戰還是貿易戰，無論是冷戰還是熱戰，都打不得、也打不贏」。

林劍嘅「奉陪到底」言論一出即刻成為熱話，即刻引發包括美國政界在內嘅強烈反應。美國國防部長赫格塞思（Pete Hegseth）接受《霍士新聞》（Fox News）訪問時就回應林劍嘅說法，強調美國並唔想同中國開戰，但必須保持實力優勢。

赫格塞思明確指出，「如果我們想要嚇阻中國或其他國家與美國開戰，我們就必須維持軍事優勢」，呢句說話被外界廣泛解讀為美方視林劍嘅發言為「全面性武力衝突戰爭」嘅姿態。

同一時間，中國外交部發言人辦公室亦喺社交平台X上大力抨擊美國用芬太尼問題做藉口挑起貿易戰，更加揚言任何形式嘅戰爭「中國都奉陪到底」。

不過，林劍星期四喺中國外交部記者會上就明顯口風放軟，佢首先重申「奉勸美方不要用自身的霸權邏輯鏡像中國，不要用過時的冷戰思維看待中美關係，不要以戰略競爭為名，行對華遏制打壓之實」

隨後又批評赫格塞思嘅言論，痛罵「美方官員的相關言論蓄意煽動意識形態對抗，鼓噪中國威脅」。又進一步強調，中國嘅立場一貫且明確，「無論是關稅戰還是貿易戰，無論是冷戰還是熱戰，都打不得、也打不贏」。

另外，針對美國司法部5日宣佈將起訴12名涉嫌黑客攻擊美國財政部嘅中國公民，指控佢哋代表中國政府從事網絡間諜活動，林劍喺喺記者會上猛烈批評美國司法部係「虛偽雙重標準」，並強調「美方才是全球最大的駭客行動發起者，現在反而賊喊捉賊，對中國進行無理指責。」《I》