今年國務院《政府工作報告》，港澳篇幅首次提及要「深化國際交往合作」。全國港澳研究會顧問劉兆佳認為，中央要求香港要證明自己對國家嘅價值。

今年全國兩會，國務院總理李強發表任內第二份《政府工作報告》，當中關於港澳部分，除咗一如以往重申「一國兩制」、「港人治港」同「高度自治」等方針，強調中央會支持香港、澳門發展經濟、改善民生，更好融入國家發展大局云云，仲有一個新焦點就係首次提出要「深化國際交往合作」。

劉兆佳解讀，所謂「深化國際交往合作」，即係香港作為國際聯繫人，要進一步發揮優勢，幫助推動大灣區走向國際，亦要為人民幣國際化出一分力，形容呢個方向將成為日後港澳發展重點工作，並直言「香港要證明自己對國家的價值。」

前副總理張高麗女婿、港區全國人大代表李聖潑喺會後表示，中央係希望香港發揮自身國際化優勢，服務國家發展。港區全國人大代表陳振英亦指出，中央希望香港繼續擔當國際投資橋樑，尤其吸引全球資本。另一名人大代表黃英豪就話，香港一定要堅定目標，保持同國際社會緊密聯繫，特別係南方國家，應該積極加強合作。

至於呢個講法係咪反映中央希望香港唔好只向內地「攤大手板」，要求惠港政策，而係要自己諗辦法，主動為國家發展作貢獻？劉兆佳認為，未來香港其中一項重要工作，就係要利用本身作為國際大都會嘅優勢，配合國家發展大局，協助中國對外開放。

劉兆佳指出，雖然目前受地緣政治影響，西方國家市場相對困難，但香港仍可開拓其他國家合作機會，例如引入外資、推動《區域全面經濟夥伴關係協定》（RCEP）發展，並加快人民幣國際化進程。

值得留意嘅係，《政府工作報告》原文中有「深化國際交往合作」呢句說法，但李強宣讀時就無提及，令人關注呢個表述嘅真正定位。對此，劉兆佳認為，可能純粹係李強讀漏，亦有可能係為節省時間，畢竟官方新聞稿最終仍有寫明呢個內容，反映中央依然重視香港喺國際層面嘅角色。《I》