美國總統特朗普早前與烏克蘭總統澤連斯基喺白宮爆發激烈爭執後，決定暫停所有對烏軍事援助。最新消息指，特朗普進一步限制盟友向烏克蘭分享美方情報。而澤連斯基就低頭稱願糾正錯誤 ，並感謝特朗普及願意簽礦產協議。

據英國《每日郵報》報導，除咗武器同軍備，所有英國情報機構同軍事部門亦已收到美方明確指令，禁止分享「可提供給烏克蘭」（Releasable to Ukraine，Rel UKR）嘅情報，呢啲情報向來係英美合作情報體系下，提供畀烏克蘭用作軍事防禦嘅關鍵情報資源。被限制嘅機構包括隸屬英國國防部嘅政府通訊總部（GCHQ）。

自俄烏戰爭爆發以來，英國、澳洲、紐西蘭等西方情報合作夥伴一直向烏克蘭提供呢類情報，幫助烏軍掌握俄軍動向，並部署防禦行動。據消息人士透露，美國政府近期已下令取消情報共享，未來情報支援將根據「進一步通知」再作決定。呢項措施恐怕會嚴重影響基輔喺俄軍攻勢下嘅自我防禦能力。

英國軍事情報專家印葛姆（Phil Ingram）向《每日郵報》表示：「美國決定禁止向烏克蘭分享美方情報，其實並唔令人意外。美國已經撤回英國等盟國嘅情報傳遞權限，並會嚴格監管基輔嘅情報機構，以限制佢哋對外情報流通。」

面對美國逐步收緊對烏克蘭嘅軍事支持，澤連斯基似乎開始調整策略，試圖修補與特朗普之間嘅關係。佢喺社交平台X發表聲明，回應上週五同特朗普喺白宮橢圓形辦公室內嘅爭執，承認會談「未能如預期般進行」，並形容事件「令人遺憾」，指「而家係時候糾正錯誤」。

澤連斯基表示，基輔願意喺「特朗普總統嘅強勢領導下」展開磋商，並願意推動烏克蘭與美國之間嘅礦產協議。他強調烏克蘭「致力於和平」，希望儘快重返談判桌，推動持久和平方案。

佢話：「沒有人想要無止境嘅戰爭。烏克蘭準備好盡快回到談判桌，讓持久和平再進一步。冇人比烏克蘭人更渴望和平，我嘅團隊同我自己已經準備好，喺特朗普總統嘅強勢領導下努力推動呢項進程。」

澤連斯基進一步提出結束戰爭嘅第一步，應該包括「釋放戰俘，並且喺空域停火——禁止導彈、遠程無人機、炸彈攻擊能源及其他民用基礎設施——同時立即喺海域實現停火，前提係俄羅斯亦採取相應行動。」佢補充，希望可以快速推進所有後續談判階段，並與美國攜手推動一項「強有力且可持續」嘅最終協議。

澤連斯基更對特朗普及美國過去嘅援助表達感激之情。佢話：「我哋確實十分珍視美國喺過去為烏克蘭提供嘅所有幫助，維護我哋嘅主權同獨立。我哋亦記得，當特朗普總統決定向烏克蘭提供標槍導彈時，戰局的確發生咗變化。我哋對此心存感激。」此外，澤連斯基亦表示烏克蘭已準備好簽署美國提出嘅礦產協議。《I》