中國財政部今（5日）公布，2025年軍費將再增加7.2%，總額高達1.78萬億元人民幣，增幅同舊年持平，亦係自2022年以嚟，連續第四年超過7%增長。自習近平上台以嚟，中國軍費年年攀升，從2013年嘅7200億元人民幣，一路上升至今1.78萬億元，增幅驚人。

《路透社》分析指出，中國軍費增幅依然高於今年經濟增長目標5%，顯示北京面對經濟下行嘅情況，依然堅持優先加強國防實力。

習近平早前已經表明，要喺2035年前全面完成解放軍現代化，確保軍力足以應對「複雜戰略環境」。近年嚟，北京加快研發新型飛彈、戰艦、潛艇同偵察技術，並強化海空軍實力。

根據公開數據，自2017年起，中國國防預算增幅分別為7%、8.1%、7.5%、6.6%、6.8%、7.1%、7.2%同7.2%，幾乎每年都大幅增加，與中國政府多次強調嘅「和平發展」立場形成鮮明對比。

而且，中國公佈嘅軍費數據未反映真實開支。台灣2019年國防報告書就曾指出，中國多年嚟未公布具體軍事支出項目，許多軍費其實係以其他名目列喺國務院所屬部門預算內，亦即係所謂嘅「黑數」。

外國智庫普遍認為，中國實際軍費開支至少係官方公佈數字嘅兩倍以上，解放軍真正使用嘅軍費可能高達3.5萬億元人民幣。呢筆龐大資金唔單止用於常規軍備發展，仲可能涉及秘密軍事項目、海外影響力擴展同網絡戰能力提升。

中國政府發表嘅最新報告再度強調「備戰」、「科學策略」同「深化政治整訓」等關鍵詞，明顯係針對解放軍內部士氣低落、貪腐醜聞不斷等問題。近期解放軍內部大清洗，已有多名高層軍官被撤職或調查，北京希望透過政治整訓，加強習近平對軍隊嘅絕對控制權。

各國武官密切關注中國軍費預算動向，有分析認為，報告中反覆提及「備戰」，意味住中國未來可能會進一步擴大軍事演習，並增加對台施壓力度。事實上，中國海軍早喺2月已破天荒喺塔斯曼海域舉行實彈軍演，迫使附近民航機改道，呢種咄咄逼人嘅軍事行動，令外界更擔憂中國軍力擴張對區域安全帶嚟嘅影響。

除咗軍費增加，中國今年「政府工作報告」中，對台政策表述亦有所變化，篇幅由舊年嘅119字增加至2025年嘅130字，較2023年嘅70字更係大幅增長，顯示北京對台灣態度進一步強硬。

報告稱要「堅定不移推進祖國統一大業，攜手共創民族復興偉業」，再次刪除「和平」字眼，意味住北京喺對台政策上，可能會採取更強硬立場，甚至以非和平方式推動統一。《I》