美國總統特朗普同烏克蘭總統澤連斯基上星期發生激烈爭執後，特朗普政府已經全面暫停對烏克蘭嘅軍事援助。同時，路透社引述消息報道，美國政府正制定計劃，可能會減輕對俄羅斯制裁。

一名唔願透露姓名嘅白宮官員喺一份簡短聲明中表示：「總統已經表明佢專注於和平，我哋需要我哋嘅夥伴都投入呢個目標。我哋會暫停並審視我哋嘅援助，確保佢哋為解決方案作出貢獻。」澤連斯基辦公室未有即時回應路透社嘅查詢。

特朗普喺今年1月上任後，改變美國對烏克蘭同俄羅斯嘅政策，對莫斯科採取較為和解嘅立場。呢次暫停援助亦發生喺特朗普同澤連斯基2月28日喺白宮發生激烈爭執之後，特朗普批評澤連斯基對華盛頓嘅支持「唔夠感激」。

特朗普喺3日再次強調，澤連斯基應該對美國支持表示更多感激。此前，美聯社引述澤連斯基話，結束戰爭仍然「遙遙無期」。特朗普隨後對此發表強烈回應，佢喺真實社群（Truth Social）發文稱：「呢個係澤連斯基可能發表過最糟糕嘅聲明，美國唔會再忍耐太耐。」

不過，特朗普3日亦話，儘管對基輔感到失望，一項開放烏克蘭礦產俾美國投資嘅協議仍然有可能達成。當被問及擴產協議是否無望時，特朗普回應：「我唔係咁認為。」佢話，呢項協議「對我哋來講係一項好交易」，並表示會喺4日晚間國會聯席會議上，進一步說明最新情況。

特朗普政府視呢份礦產協議為美國收回自俄羅斯3年前入侵烏克蘭以來，提供俾烏克蘭數百億美元經費及軍事援助嘅方法。

與此同時，路透社引述消息人士報道，白宮已經指示國務院及財政部列出可以放寬制裁嘅清單，供美方官員喺未來幾日內與俄羅斯代表討論。

據悉，白宮要求國務院與財政部擬定可放寬制裁名單，作為與莫斯科更廣泛外交及經濟談判嘅一部分。消息人士表示，有關制裁辦公室正起草解除制裁提案，當中可能涉及部分俄羅斯企業、個人，甚至包括俄羅斯寡頭。

報道指，美國政府內部通常會準備所謂「選項文件（options papers）」去評估制裁策略，但白宮近期特別要求制定此文件，顯示特朗普及其顧問有意透過放寬對俄制裁，與莫斯科達成潛在協議。目前尚不清楚，美國會向俄羅斯提出咩具體要求，作為換取減免制裁嘅條件。

自2022年以來，美國對俄制裁主要針對俄羅斯能源業，限制其石油及天然氣收入，以削弱俄方戰爭資金來源。西方國家主導嘅制裁措施包括將俄羅斯石油出口價格上限定於每桶60美元。此外，拜登政府喺卸任前，於1月10日實施咗有史以來最嚴厲嘅俄羅斯能源制裁，封鎖部分俄國能源企業及運輸油輪。

特朗普今年1月曾經警告，如果俄羅斯總統普京唔願意與烏克蘭談判，美國會進一步加強對俄制裁。但近期，特朗普政府官員則明確表示，可能會考慮放寬制裁。

美國財政部官員貝森特（Scott Bessent）喺2月20日接受彭博電視訪問時表示，俄羅斯可能會獲得經濟減免，但最終決定取決於未來幾星期內談判進展。特朗普則喺2月26日對媒體表示，未來「某個時候」可能會放寬對俄制裁。

據美國官員透露，白宮喺上星期要求國務院與財政部擬定放寬制裁嘅方案，呢項決策發生喺特朗普剛剛延長美國對烏克蘭戰爭嘅「國家緊急狀態」之後。

呢項「國家緊急狀態」涵蓋咗一系列對俄制裁，針對與俄烏戰爭相關嘅資產同個人，並自2014年俄羅斯併吞克里米亞以嚟一直有效，當時呢啲措施由前總統奧巴馬政府首次實施。

目前尚未清楚特朗普政府將會優先解除邊啲制裁。法律專家指出，特朗普可以透過簽署行政命令，開始部分解除對俄制裁嘅程序，但若涉及特定企業同個人，仍然需要國會批准。

莫里森·福斯特律師事務所（Morrison Foerster）合夥人、前美國財政部外國資產控制辦公室（OFAC）主任史密斯（John Smith）表示，特朗普若要全面解除對俄制裁，仍須獲得國會同意。

自2022年以來，俄羅斯透過增加軍事支出同工業生產，成功建立戰時經濟，但專家指出，俄國經濟仍然脆弱，急需西方解除制裁以恢復發展。俄羅斯方面則表示，願意與美國進行經濟合作。

克里姆林宮上星期指出，俄羅斯擁有豐富嘅稀土金屬資源，並對與美國合作開發持開放態度。普京此前亦表示，唔排除與美國進行礦產合作嘅可能性。若要正式達成美俄經濟協議，美國勢必要放寬對俄制裁。《I》