俄羅斯表示，「絕對同意」特朗普要求澤連斯基結束俄烏「衝突」嘅立場，已經同意同美國恢復就多個議題進行對話，包括有關交換烏克蘭戰俘嘅事宜。不過，無法接受北大西洋公約組織（NATO）成員國嘅軍隊進駐烏克蘭執行維和任務。

根據法新社嘅報導，克里姆林宮發言人佩斯科夫（Dmitry Peskov）表示，俄方已經決定開始恢復同美國嘅各方面對話，雙方關係喺18號喺沙地阿拉伯會議後開始破冰。

另外，對於美國總統特朗普（Donald Trump）呼籲烏克蘭總統澤連斯基（Volodymyr Zelenskyy）盡快采取行動結束俄烏衝突，克里姆林宮亦表示「絕對同意」特朗普嘅立場。佩斯科夫話：「我哋已經講過，相比（前任）美國政府，現時嘅情況對我哋更加有利，我哋完全同意美國政府嘅立場。」

路透社報導，克里姆林宮仲強烈表明，對於英國計劃派遣軍隊到烏克蘭參與維和任務「無法接受」。俄方會密切關注英國首相施紀賢（Keir Starmer）有關此事嘅進一步表態。

施紀賢之前表示，英國「已經準備好」並「願意」派遣英軍赴烏克蘭，作為對莫斯科同基輔停火協議嘅安全保障。英國《每日電訊報》報道，施紀賢計劃向特朗普提出建議，邀請歐洲派遣少於三萬名士兵到烏克蘭，並要求美國同意為呢支部隊提供保護。

佩斯科夫強調，俄羅斯「無法接受」呢個提議，因為如果派遣維和部隊嘅話，勢必會包含北約成員國嘅軍隊，而呢啲軍隊嘅存在會對俄羅斯安全造成威脅。培斯科夫表示：「呢個提議引起我哋嘅憂慮，因為所謂嘅軍事特遣隊，最終有可能係由北約軍隊組成，並被派遣到烏克蘭。」

美國國家安全顧問沃爾茲（Mike Walz）19日表示，法國總統馬克龍（Emmanuel Macron）同英國首相施紀賢將會喺下星期訪問華盛頓，與美方討論俄烏戰爭等相關問題。

馬克龍喺20號（周四）證實，佢將會喺下星期一到訪華盛頓，並遊說特朗普令歐、美繼續企喺同一邊。馬克龍強調，如果對俄羅斯總統普京示弱，歐美將會更難應付中國同伊朗。而施紀賢亦會緊接住馬克龍之後訪美

馬克龍喺社交媒體一小時問答環節中話：「特朗普，我了解佢，我尊重佢，我相信佢都尊重我」，又話：「我會話畀佢聽：喺內心深處，你唔會喺普京面前示弱。呢個唔係你嘅本性，亦唔符合你嘅利益。」《I》