美國之音報道，香港去年度錄得整體罪案達9萬5千宗，對比前一年上升5%，主因是詐騙案驟增。事實上，《港區國安法》同《基本法》23條先後實施後，香港治安反而每況愈下。

警方最新數字顯示，2024年全港共發生94,747宗罪案，整體罪案率較2023年上升5%，當中大部分升幅來自詐騙案，同時亦標誌香港連續6年罪案率上升。警方進一步指出，舊年詐騙案約有4萬4千宗，比2023年多11.7%，占整體罪案近5成，其中多屬網上騙案、尤其常見假客服。警方去年為詐騙案拘捕逾一萬人，較2023年升13.6%。

《港區國安法》頒布至今已臨近5周年，再加上《基本法》23條喺舊年3月底正式生效。截止舊年12月底，警方以違反上述兩法拘捕316人，約6成被捕者已被檢控。

雖然中央同香港特區政府不斷強調《港版國安法》實施後香港「由治及興」，《基本法》23條立法後更可專注經濟建設，但警務處處長蕭澤頤表示，2025年警方首要工作依然係「維護中國國家安全」，會加強情報搜集、防範香港本土恐怖主義，並提升「國安意識」。

本地政治學者黃偉國表示，現時香港面臨過千億港元財政赤字（約130億美元），警方要繼續「用國家安全」來維持大量國安撥款，並操作所謂「國安產業」。

黃偉國預測，呢啲做法甚至可能令官方喺未來再大肆渲染國安威脅，好似講「沒了國安香港政權就會滅亡」，或者會爆發顏色革命，甚至重現黑暴示威等「戲碼」，讓公眾不斷被「國安風險」氛圍籠罩。

黃偉國認為，警方是否披露《基本法》23條實際執法數字並唔係最關鍵，關鍵嘅係警方經常高調帶傳媒拍攝一啲被騷擾海外港人家屬嘅畫面，或者高調拘捕某些人，最後又低調放人，呢啲正正就係果百幾億國家安全撥款嘅用途。

佢舉例形容，現時要喺香港搵一位學者願意評論本地政治、民調數據甚至更廣泛嘅政治、社會、經濟、文化、福利、醫療議題都愈來愈難，呢啲正顯示《港版國安法》已經搞到全社會「雞犬不寧」。《I》