澤連斯基︰普京野心不只在烏克蘭 若美軍撤出北約 東歐防線恐於夏季崩塌
澤連斯基︰普京野心不只在烏克蘭 若美軍撤出北約 東歐防線恐於夏季崩塌

烏克蘭總統澤連斯基喺美國國家廣播公司(NBC)16日播出嘅專訪裡,強調任何俄烏和平協議都必須有基輔直接參與,同時直指俄羅斯總統普京嘅野心唔止喺烏克蘭,仲警告俄羅斯今年夏天可能進一步對北約搞軍事行動。

 

澤連斯基接受訪問時明言,今場針對烏克蘭嘅戰爭「每日都帶來可怕傷亡代價」。被問到特朗普政府曾嘗試撮合美俄和談,澤連斯基表態:「絕不接受繞過烏克蘭搞密室交易,任何解決方案都一定要以烏克蘭為主體。」

 

澤連斯基表示,情報顯示俄軍已經喺白俄羅斯進行軍演,訓練15萬部隊部署襲擊北約東翼陣地,有可能一到夏天就動手。佢警告,如果普京無法全面吞併烏克蘭,或會轉向立陶宛等前蘇聯國家。一旦美軍撤離北約東線,東歐防線於夏天崩盤唔係冇可能。

 

澤連斯基亦強調,烏克蘭境內擁有豐富稀土、鈦、鈾、鋰等戰略性資源,足以供應全球工業40年,尤其俄軍佔領區入面嘅礦產更是價值驚人。佢強調,絶對唔容這些資源落入普京或其盟友伊朗、北韓同中國手裡。

 

談到美方「五成礦權換軍援」嘅提案時,佢表示任何協議都必須平等互惠,美方亦需提供包括先進飛彈系統喺內嘅安全保證。

 

對於美國國防部長赫格塞斯聲稱「收復2014年前失土不切實際」,澤連斯基拿憲法回應,指烏克蘭禁止承認俄羅斯對佔領區擁有主權。不過,澤連斯基首次鬆口,若能取得北約成員身分,可考慮以外交手段解決領土爭議,並呼籲北約派駐軍隊以加強安全。

 

澤連斯基坦言,軍事上要完全勝利仍有可能,但代價將非常高,若盟友停供軍援,戰爭亦將無限期拖延。佢更透露,烏軍今年1月就有4200人陣亡,傷亡慘重。

 

雖然澤連斯基質疑特朗普同普京之前通話透明度,但又肯定特朗普對普京有一定威懾力,認為普京本質上是一個「恐怖分子」,而特朗普強硬立場令佢頗為忌憚,或許可以開啟和談契機。不過,澤連斯基再度強調,唔可以由任何國家代替烏克蘭同俄羅斯簽協議,必須美、歐、俄、烏四方一齊坐低傾。

 

澤連斯基亦警告,包括特朗普在內,任何人都唔應該輕信普京嘅單方面言詞。佢舉自己例子:2019年本來接近同俄羅斯達成和平協議,結果最後仍然破局,顯示普京只想利用協商爭取時間、暫時停火,再訓練兵力,仍然會意圖侵佔烏克蘭。《I》

發佈時間: 2025年02月18日 14:20
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.