德國之聲報道，美國近年越趨單邊主義同孤立主義嘅做法，令中國有機可趁，正全力填補美國所留下嘅空缺，同時正加快腳步離間歐、美關係。

美國副總統萬斯（J.D. Vance）2月14日喺慕尼黑安全會議上嘅一番演說，當場就激怒咗唔少出席嘅歐洲政要，因為佢直斥歐洲嘅言論自由「倒退」，又批評歐洲接收過多移民，仲幫總統特朗普（Donald Trump）就俄烏問題所提出嘅和平構想辯護。

德國國防部長皮斯托留斯（Boris Pistorius）形容萬斯嘅講法「無法接受」。烏克蘭總統佛拉澤連斯基（Volodymyr Zelenskyy）亦喺翌日演說入面暗示，歐美幾十年嚟建立嘅關係，似乎去到一個將會終結嘅關鍵時刻。

相比之下，中國外長王毅則喺同一場合表現出較為親和同包容態度，強調中國視歐洲為夥伴，並願意以「建設性作用」推動俄烏之間和平談判。佢同德國總理朔爾茨（Olaf Scholz）會晤之後，亦表示中國樂意深化同德國全方位合作，並呼籲中國同歐盟一齊強調「優勢互補、深化務實合作」，同「堅持自由貿易、實踐多邊主義」。

美國政治學者艾利森（Graham Allison）再度提及十幾年前佢提出嘅「修昔底德陷阱」觀點，認為中國作為崛起中大國，一定會盡晒力去取代美國一直以嚟穩坐嘅強勢地位。

佢直言：「如果美國退出一個又一個貿易協定，咁中國呢類靠貿易發展經濟增長嘅國家，自然會去填補空隙。」特朗普上任以後相繼退出世界衛生組織等國際機構，艾利森認為呢啲舉動畀咗北京一個大好機會，「習近平已經見到呢個形勢，如果美國唔識好好打牌，北京要成功就更加容易」。而今次萬斯呢番激進言論只係令歐洲更反感。

此次慕尼黑安全會議上，俄烏戰爭自然成為焦點議題，而中國想摘下俄烏和平嘅「果實」，亦成為外界關注重點。北京同莫斯科之間關係緊密但微妙，某程度上卻阻礙咗歐洲要同中國進一步合作。

峰會期間，會議主席、德國資深外交官霍伊斯根（Christoph Heusgen）就直接向王毅質疑，點解北京依然靠擴大中俄貿易嘅方式支援俄羅斯？王毅就辯解稱，中國需要大量天然氣，如果唔同俄羅斯買，冇其他國家可以滿足到中國眾多民眾所需。同時，王毅亦呼籲作為利益直接攸關方嘅歐洲，應該喺俄烏衝突上扮演更積極推動和平嘅角色。

艾利森分析，中國近期明顯想塑造自己做「和平締造者」，想向全世界表明唔支持戰爭，而且會積極參與止戰進程。

不過，歐洲其實都有一派聲音擔心中國會成為最大贏家。立陶宛前外長蘭茨比吉斯（Gabrielius Landsbergis）喺慕尼黑會議上提醒，如果歐洲諸國無法團結一致去接住美國退場後援助烏克蘭、抗衡俄羅斯嘅責任，中國就有可能乘虛而入，扮演起保護烏克蘭嘅角色。《I》