美國政治新聞網站Politico上星期四揭露，由全球首富馬斯克掌管並屬於政府體制之外的「政府效率部」（DOGE），最近將「開刀」目標轉向一個長年得到共和黨支持、致力推動海外民主嘅非牟利機構──國家民主基金會（National Endowment for Democracy，簡稱NED）。

馬斯克近日喺X（前Twitter）發文，大力抨擊NED「充滿腐敗」，甚至暗示涉及某些未詳述嘅「犯罪行為」，更加喺今個月初指「呢個邪惡組織應該被拆散」。呢番猛烈攻勢之後，NED被切斷從美國財政部領取撥款嘅渠道，導致該組織資助嘅唔少民主及公民社會團體開始裁員。

NED喺上周三向旗下獲資助機構發通知，指目前無法取得國會撥款，因此即日起停止支付款項。NED聲明表示：「當資金耗盡之後，請將同我哋之間嘅協議視為暫停狀態。」

根據《時代》雜誌上星期四報道，馬斯克當日透過視像連線參加喺阿聯酋迪拜舉行嘅世界政府峰會發表演講。當講到美國外交政策時，馬斯克表達更傾向孤立主義思維，尤其喺中東問題上。

佢提到，美國曾因應911恐襲而發動阿富汗、伊拉克戰爭，但而家重點應該改變。馬斯克提及特朗普政府解散該機構嘅動議：「好似美國國際開發署（USAID）引起好多關注….仲有國家民主基金會（NED），但我想問：『佢哋最近到底帶來咗幾多民主？』」

馬斯克又話，特朗普政府「並唔係咁想干涉其他國家內政」，強調「美國有時過度介入國際事務」。佢強調，「美國應該管好自己，而唔係四圍搞政權更迭」。NED於1983年成立，自列根總統時期就作為美國反共戰略產物。雖然組織本身宣稱跨黨派，但長久以嚟一直得到共和黨建制派嘅大力支持。

舊年8月，中國外交部就發表一份題為《美國國家民主基金會的所作所為及真實面目》嘅報告，痛批NED係美國政府「白手套」，長期打住「促進民主」旗號，顛覆他國政權、干預別國內政、煽動分裂對抗、操控輿論同進行思想滲透等，指其惡行「罄竹難書」，對國際局勢造成嚴重破壞，已經受到多方強烈譴責。

今（17日），黨媒文匯報再以標題「高度警惕亂港黑金 拒港版顏色革命重演」為標題大讚馬斯克呢項舉動。其實，中共官方一直視NED為「眼中釘」，馬斯克此次抽走NED資金，正好合乎中共口味。

文匯報稱，「NED長期扮演美國政府白手套，打着促進民主幌子，顛覆他國政權，干涉別國內政，煽動反中亂港，惡行劣跡罄竹難書」。又話「港人必須看清其真面目。香港雖然進入由治及興新階段，仍應汲取港版顏色革命教訓，高度警惕外部勢力反中亂港絕不會偃旗息鼓，持續築牢國安防線，確保香港長治久安」云云。《I》