網媒「Channel C HK」報道，中國外交部長王毅昨日（13號）到英國訪問，分別同英國外相林德偉（David Lammy）同英國國家安全顧問鮑威爾（Jonathan Powell）會晤，其間英國首相施紀賢（Keir Starmer）亦突然現身一同會談。施紀賢表示，希望英國同中國之間建立「持續而互相尊重」嘅長期夥伴關係；王毅則強調，最近中英兩國多層級接觸陸續重啟，「足以証明工黨政府奉行對華理性務實政策，符合英國國家同人民利益」。

王毅同鮑威爾會面嘅時候，施紀賢中途加入，之後以首相身分向傳媒表示，英國同中國之間需要「持續而互相尊重」嘅互動，並且希望在經貿、投資以及其他互惠合作上加深交流。同時，英方亦會就雙邊存在分歧領域保持坦誠溝通，強調呢種做法係「英中穩定且恆常接觸」嘅一部分。

中國外交部引述王毅對施紀賢表示，舊年中國國家主席習近平曾經同施紀賢會晤，啟動中英關係改善進程；而最近一連串兩國各層級往嚟得以恢復，盡顯出雙方務實合作潛力甚大，「亦充分說明工黨政府走理性務實對華政策，順應時代發展潮流，對國家同人民均有益處」。王毅強調，中英兩國正處於「百年變局加速演進」嘅關鍵時刻，應該加強戰略層面嘅溝通協調，並在氣候變化、人工智能、綠色發展等範疇深化合作，造福世界。

王毅其後同英國外相林德偉進行「中英戰略對話」。據悉，這次係該機制自2018年以嚟首次重啟。林德偉談完之後表示，佢哋雙方討論咗國際安全、烏克蘭同中東局勢，相信英國同中國保持務實合作符合英方利益，雙方可在貿易領域推動經濟增長。同時佢亦聲言，會就壹傳媒創辦人黎智英事件、中國人權問題同中國針對英國國會議員採取嘅制裁行動「繼續提出挑戰」。

其實，今次早就已經唔係工黨政府第一次嘗試「奶共」。較早前，英國外相林德偉（David Lammy）同內政大臣顧綺慧（Yvette Cooper）近日聯署去信英格蘭規劃監督局，表明支持中國駐英大使館喺倫敦嘅重置計劃。此舉引發外界爭議，因為無論係情報部門、民間組織甚至地方議會都表達強烈反對聲音。有批評指工黨政府此舉係向北京妥協，為爭取經濟利益而犧牲國家安全，向中共傳遞錯誤訊息。

林德偉同顧綺慧於上個月14日聯署去信英格蘭規劃監督局，支持中國駐英大使館重置計劃，指「每個國家都應該喺對方首都擁有能正常運作嘅外交設施」。信中提到，大倫敦警察廳經檢視後認為新使館選址後警力足夠應付示威集會，因此撤回反對意向。而中方亦表示願意關閉倫敦市內7個外交設施以換取重置大使館嘅支持。

新大使館選址方案已被倫敦塔村區市議會否決，大倫敦警察廳同當地居民亦表達反對意見，但工黨政府仍強調重置計劃係外交優先事項。

被中國政府制裁嘅保守黨國會議員施志安（Iain Duncan Smith）就喺《每日電訊報》撰文，抨擊工黨自舊年上台後轉變對華態度，並質疑此舉或會令英國變成「中國殖民地」。施志安指出，英國過往曾透過討好中國去爭取經濟利益，但並未成功，現屆政府若重蹈覆轍恐怕又會被誤導。《I》