《美國之音》報道，美國總統特朗普喺星期三（12日）宣佈，佢計劃一邊推出關稅政策，一邊推動降低利率。特朗普星期三早上喺社交媒體發文：「利率應該降低，同即將實施嘅關稅一齊推行！美國，動起嚟吧！」

傳統上為保證美聯儲（美國央行）唔受政治干預，美國總統慣常會避免干預貨幣同利率政策，但特朗普就毫不避忌。今年1月，佢喺瑞士達沃斯世界經濟論壇上透過視像演講表明「要求立即降息」，並聲稱：「我比佢哋（美聯儲官員）更了解利率。」

特朗普點名批評自己喺2017年委任、任期至2026年嘅聯儲局主席鮑威爾（Jerome Powell），認為對方無力應對通脹同就業。

特朗普想對貿易夥伴實施懲罰措施，再同步降利率。佢星期三下午進一步表示，或會喺星期四批准對等關稅：「我哋要做對等關稅，簡單嚟講，如果佢哋要我哋畀錢，我哋就要佢哋畀錢。」

白宮經濟顧問哈塞特（Kevin Hassett）周三同記者講，對等關稅絕對係總統首要任務，仲話今日就會有進一步行動。哈塞特表示，白宮早已同其他國家商討，為關稅落實打下基礎，但詳細稅率適用於咩行業、點樣落實仲要敲定。

根據世界貿易組織（WTO）規則，各會員國有權對進口產品徵稅，但稅率需喺WTO框架下談判，以確定最高徵稅水平。

根據星期三公佈嘅數據顯示，美國1月通脹率上升到3%，前一個月則為2.9%。白宮新聞秘書萊維特（Karoline Leavitt）將通脹升溫怪責舊政府，話此事反映拜登政府當年處理通脹危機無能，又缺乏透明度。

佢強調，特朗普希望降低利率同通脹率，認為本屆政府整合各部門嘅經濟政策，最終能推低通脹水平。不過，有經濟學者警告，高關稅加低利率結合，反而恐怕會推高通脹。

彼得森國際經濟研究所高級研究員加農（Joseph Gagnon）批評，特朗普計劃顯示佢「對經濟運作模式有誤解」。加農話：「關稅會直接推高價格，屬於通脹因素；而太大幅度嘅降息又會推動通脹；考慮到今日時勢，降息並唔係好主意。」

聯儲局主席鮑威爾星期二出席參議院銀行委員會聽證會時，指經濟已漸趨穩定，美聯儲暫時無意急降息。佢指出，舊年通脹率2.6%，雖然仍高於聯儲2%目標，但就業市場降温速度並唔算驚人，目前失業率4%。

加農進一步提醒，貿易戰或者近在眉睫。特朗普星期一已表明，3月12號開始對所有進口鋼鋁徵收25%關稅，首當其衝就係美國最大鋼鐵供應國加拿大，然後依序係巴西、墨西哥、南韓、德國等。加拿大亦係美國鋁進口主要來源，勢必造成更大貿易摩擦。

RSM首席經濟學家布魯蘇埃拉斯（Joseph Brusuelas）指，如果所有徵稅政策落實，對中國、墨西哥、加拿大徵收新稅會令美國平均關稅稅率由目前3%推高至10.7%。

佢表示：「如果貿易衝突進一步升級，包含歐盟都牽涉入嚟，並演變成一場全面貿易戰，美國GDP增長可能回落至2%，因為關稅會拖累增長同就業、推高通脹同擴大經常賬赤字，而呢一切都喺利率走高環境發生。」《I》