綜合台灣媒體報道，台灣台中新光三越百貨11樓、12樓，今（13日）中午發生氣體爆炸，衝擊波震碎大樓外牆。事發時正值午餐時段，12樓有四個人「被炸飛」，目前最少造成四死，其中一名男子炸至半張面都冇咗，倒臥喺大門口，明顯已經死亡。爆炸亦造成五名澳門人受傷。

爆炸之後，大樓門前廣場滿地玻璃碎，甚至傳出升降機震毀垮塌，商場宣布緊急疏散顧客，現場情況極度嚴峻。台中市消防局透露，已有一名男子現場證實死亡，另外一名大約50歲女性被救出時無生命迹象，送院急救中。仍有數名傷者在現場，消防局已經啟動重大傷亡通報，並將災害應變中心由三級升到二級，各部門都派人進駐市災害應變中心。

台中市政府消防局長孫福佑親自趕到現場指揮救援，佢向傳媒表示，今早12樓有裝修工程，是否因工程引致氣爆仲要等火調人員調查。目前優先搶救人命，正清查爆炸源頭喺邊家商舖。

孫福佑續指，消防員持續喺11樓、12樓搜索，疑有兩人被困升降機；現時有八人送院治療，其中兩人到院前心跳停止（OHCA），一人明顯死亡，分送到澄清綜合醫院、林新醫院、台中榮民總醫院。稍後，消防局再更新消息指，救護車救走9名傷者，1人自行求醫，另1人明顯死亡無送院，共累計11人死傷。

事發後，消防緊急調動27輛消防車、62名人員到場，由第六大隊大隊長蔡孟栩任指揮。警方亦通知市政北七路同惠來路口封路，禁止民眾通行或圍觀。多部救護車趕往現場，但因事發中午車流繁忙，有救護車塞車未能即時抵達。

有網民正好駕車經過百貨公司外嘅台灣大道，行車記錄儀拍到爆炸那刻：大量濃煙自高層噴出，大量石屎同玻璃碎屑從天而降，巨大衝擊力把碎片彈到對面行車道，令車輛驚險閃避。

一名李姓男子當時正在新光三越附近工作，佢話聽到一聲巨響，轉眼就見到高樓爆破之後一片狼藉。唔少民眾網上留言，指爆炸聲傳到兩公里外，紛紛驚呼「太恐怖」。

網上流傳現場片段顯示，整層玻璃噴飛到馬路上面，騰起陣陣白煙。之後有最新畫面顯示，電梯區受強大氣爆力衝擊，電梯門變形，電子看板被炸爛，地上到處都係磚頭瓦礫，好似人間煉獄般慘烈。百貨公司緊急宣布今日封館停業一天。《I》

圖／來源：台媒民視新聞

圖／來源：台媒壹蘋新聞網