第九屆亞洲冬季運動會（亞冬運）正喺哈爾濱舉行，香港男子冰球隊昨日（9號）喺小組賽C組以5比1擊敗土庫曼。不過賽後握手時出現混亂：有港隊球員被扯走頭盔、有人被揮拳放倒，即場3名港隊球員受傷，其中有人頸部扭傷、有隊員手部要當場縫針。土庫曼隊3名球員因打架被處罰。據了解，賽事期間已多次出現推撞，裁判當時曾經考慮取消賽後握手，但最後仍然維持，結果發生激烈衝突。

有小紅書用戶上載約35秒影片，見到身穿白衫嘅香港球員同著綠衫嘅土庫曼球員賽後例行握手。期間，港隊4號球員疑似被對方拉住頭盔，整個人向前倒地；有人攞住頭盔在冰面揮動，黑白間條上衣嘅球證則坐喺地上抱住其中一名港隊球員。

之後土庫曼隊25號球員推撞多名港隊球員，另一名土庫曼球員更當場揮拳擊向港隊16號球員，令佢倒地兼頭盔飛脫。一些港隊球員想向球證抗議，球證示意雙方分開，卻有兩名港隊球員近土庫曼隊位置被拉跌，綠衫球員有人繼續揮拳、有人揮冰球棍，場面極為混亂。

消息指港隊實力佔優，最終以5比1取勝，比賽期間雙方多次發生推撞，火藥味甚濃。裁判賽後曾經商討是否取消握手，但最終仍維持傳統儀式。不幸地，一握手就引爆衝突場面。據悉，港隊有三人受傷，一人頸部有創、另一人手部即場縫針兼到醫院打破傷風針，第三人則受輕傷已出院。

身兼代表團團長嘅霍啟剛（港協暨奧委會副會長）今日（10號）表示對事件十分震驚、難以接受，已即時要求國際冰聯、亞奧理事會等召開會議作嚴正交涉。佢指國際冰聯將召開紀律聆訊委員會，相信會對土庫曼作出合理懲罰。霍啟剛又透露，比賽過程中對方多次用手勢及惡意動作挑釁港隊。所幸隊醫評估後，受傷球員今晚仍可參加後續賽事。霍啟剛肯定港隊球員被挑釁都堅守尊重同友誼精神，無作出任何反擊或失控舉動，值得嘉許。

正喺哈爾濱嘅特首李家超今早同文體旅局局長羅淑佩、特首辦主任葉文娟到運動員村探望三位受傷球員，祝其早日康復，並要求文化體育及旅遊局同港協全力跟進，確保港隊安全。李家超晚上喺社交平台話，現時三名球員狀況無大礙，或可繼續今晚比賽，希望佢哋盡最大努力保持良好心理狀態，以專業態度出戰，維持士氣，並強調港府會做好保障球員安全。

李家超盛讚港隊男子冰球隊連日來表現出色，亦感謝隊員衝突當中保持冷靜與克制，向世界展示香港運動員嘅專業同體育道德。佢亦多謝在場觀眾及香港市民對港隊支持，希望繼續為港隊打氣，發揚香港精神。

賽會裁判當時已宣佈，土庫曼隊三名涉事球員多夫列特米亞拉多夫、蓋爾季米亞羅多夫同卡卡巴耶夫，因打架被罰「5分鐘大罰+20分鐘違例」。據悉佢哋有機會再被加罰。後續整個紀律程序如何判決，有待國際冰球總會同亞奧理事會最終公布。《I》