美國總統特朗普（Donald Trump）7號喺華府同日本內閣總理大臣石破茂會面之後，美日聯合聲明清楚表明「反對任何以武力或脅迫手段、單方面改變台灣現狀嘅企圖」。點解特朗普第一次同石破茂見面，就要咁大陣仗宣示維持台海現狀？最新一期《經濟學人》（The Economist）分析，係因為唔少國家已經倒向北京嘅立場。

《經濟學人》9號刊出一篇叫〈中國驚人攻勢翻轉世界反對台灣：70國最近已支持『中國以任何行動』奪下此島〉嘅報道，用咗「turn the world against …」做標題，指出中國近18個月不斷喺全球南方國家發動新攻勢，已經有70個國家認可中國擁有以「任何手段」奪取台灣嘅權利。之所以要「認可」，正正就係因為並唔係用常規方式取得，所以中國希望獲得全球大部分國家認可其行動合法，令聯合國難以對中國侵台作出制裁甚至譴責，即意味到時全球對中國侵台後可能出現嘅西方制裁，遠遠唔及俄羅斯侵略烏克蘭之後嘅制裁全面。

因俄烏戰爭而被制裁嘅俄羅斯，透過其同其他支持佢嘅國家展開經貿合作，成功繞過西方制裁，例如同非洲搞黃金買賣。澳洲前國防官員赫斯科維奇（Benjamin Herscovitch）正在洛伊研究所（Lowy Institute）中發表報告指出，近一半聯合國成員國不論有意無意，已經「正式支持」中國接管台灣。佢進一步解釋，實際上呢班國家喺真實情況下會點反應仲未可知，但中國或會將之包裝成好似全球開綠燈。

中國近年大力推動「一帶一路」基礎建設計畫，報道話，嗰70個國家幾乎遍布世界各大洲，逾九成位於全球南方，例如南非、埃及、巴基斯坦。好多國家畀中國投資港口等基建，換取關鍵自然資源——一旦中國用武力奪台，而美國想全球合作抵制中國，呢批國家就可能唔配合。

現時美軍要反擊，中途需要用到唔少全球南方地區，例如太平洋多個國家嘅基地、港口同設施，但如果大部分國家都認為美方行動唔合法，甚至部分美國盟國都被中國拉攏住，對美軍行動肯定大打折扣。新加坡國立大學教授莊嘉穎（Ja Ian Chong）指出，俄羅斯受到國際政治孤立令中國更警惕，所以中國要提早布局，避免屆時重蹈俄羅斯覆轍。至於「表現合法性」亦一向係中國外交慣常做法。

報道同時亦提到，剛上台不久嘅美國總統特朗普令形勢更複雜。2017年，台灣總統蔡英文就職唔久，巴拿馬忽然宣佈同台灣斷交，被視為中國對台灣之強力震懾。但特朗普後來要求巴拿馬政府收回巴拿馬運河控制權，巴拿馬總統穆里諾（Jose Raul Mulino）6號宣布退出中國「一帶一路」；中國外交部就批評是美方施壓所致。而美國國務院亦知道，拆解一帶一路就等同拆解中國遍及全球外交、經濟網絡，今次外交角力能否獲勝，亦可能影響中國有冇膽量、或幾時武力犯台。《I》