英國保守黨黨魁栢丹娜（Kemi Badenoch）近期接受英國廣播公司（BBC）訪問時，建議應該將新移民「轉正」成公民資格嘅居住年期，從現時一般所需住滿6年（5+1），大幅拉長至15年（10+5）之後先可以申請英國公民身份。呢個消息一出，隨即引發唔少移英港人熱烈討論。

公民身份需予「有意義」人士

栢丹娜表示，英國公民身份唔只係一項權利，而係一項特權（privilege），所以應該留給「與英國有真正、有意義聯繫」嘅移民。

佢認為，新來到英國嘅移民好似構成一條「傳送帶」（conveyor belt），用嚟快速獲得公民資格，令大量人想藉此機會攞身份，令公共服務承受壓力。佢覺得英國應該保證嚟自海外嘅人同英國有更深度連結，必須對經濟有貢獻，而且冇犯罪紀錄。

英國現行制度下，新移民一般要喺當地連續居住5年先可以申請ILR（永久居留權），再等12個月才可以申請入籍成為英國公民。不過栢丹娜主張，申請ILR應該從5年拉到10年，而獲得ILR之後再等足5年先可申請入籍。

以BNO簽證移英嘅不少港人，原本都可以走「5+1」路線：喺英國住夠5年後申請ILR，再住1年就能申請成為英國公民；另一方面，一般工作簽證持有人住夠5年都可申請ILR，但如果持創業、專才或投資簽證，有機會只需2至3年；以及英國公民配偶可在攞到ILR後即時申請入籍。

保守黨：要設移民人數「硬上限」

英國國會下周將商討有關邊境安全、難民同移民法案。保守黨希望由工黨組成嘅政府接納相關建議，並且將變動追溯至2021年。英國喺2021年擴大英國國民（海外）護照（BNO）持有人嘅權益，讓港人可以透過「5+1」年後申請做英國公民。

1984年，中國同英國簽訂《中英聯合聲明》，確認香港主權移交。之後英國1985年頒佈《香港法案》（Hong Kong Act），規定香港居民喺1997年7月1日之後唔再享有英國屬土公民身份同居留權，同時唔能使用英國屬土公民護照。但為咗保留英國同香港居民之間某種聯繫，英國又畀香港居民登記成「英國國民（海外）」身份，只要喺1997年6月30日前已經歸化成英國屬土公民並自願申請即可。

2020年7月1日，英國政府認定中國喺香港實施《港區國安法》違反《中英聯合聲明》，並違背保障香港自由、自治及司法獨立嘅承諾，所以宣布自2021年1月起，符合申請BNO資格嘅港人及家屬，可以嚟英國讀書、工作滿5年後先攞ILR，再住12個月就可以成為英國公民，係英國政府首次俾BNO持有人額外權益。

工黨：冇人會嚴肅對待呢個建議

不過英國內政部轄下邊境安全及難民部政務次官、工黨籍葉安琪（Angela Eagle）就反駁，保守黨已經執政14年，卻喺移民問題上屢屢失敗，冇人會認真對待佢哋此刻拋出嚟嘅新政策。栢丹娜亦承認，保守黨執政期間錯失機會、犯下錯誤，但佢強調，若然延長居住年期申請永居、延後入籍要求，可以大幅降低移民人數，又認為移民總量應該設硬上限。不過，栢丹娜就冇列出個別數字。《I》