泰國喺5日早上起，正式切斷對緬甸邊境5個主要供電點電力，以配合打擊跨境電信詐騙嘅決策。今次斷電措施影響緬甸孟邦、撣邦、克倫邦包括大其力、妙瓦底（Myawaddy）等地區，合共約20.37兆瓦供電量，外界關注當地詐騙園區會唔會陷入「末日」。

不過《曼谷郵報》指，詐騙園區似乎「未受明顯衝擊」，因為佢哋早已備有發電機，部分地區亦陸續恢復供電。例如大其力計劃向老撾買電，當地三大電訊公司亦繼續維持手機訊號，令通訊唔會中斷。大其力居民就因為擔心燃料短缺，紛紛去油站排隊入油，油價升逾一倍，導致好多居民要喺黑暗下捱過第一晚，只能靠發電機或太陽能系統暫時維持電力。

妙瓦底嘅KK園區所在位置，跨境商業活動仍然如常，但因斷電風險，居民開始囤油。帕亞通祖燃料價格持續向上，一些娛樂場所因此停業，但受中資支持嘅賭場同娛樂場所因自帶後備發電機，影響相對有限。報道指泰國軍方已要求三支邊防部隊嚴防被斷電區域居民大規模偷渡入境，同時醫院同收容中心都要做足準備。

同時，泰國最大國營石油公司亦表態願意配合政府，隨時準備停止對緬甸出口燃油。緬甸軍方就則回應，表示願意同泰國加強合作，共同打擊跨境犯罪。但泰國傳媒對是次斷電行動能否真正瓦解電騙集團仍抱懷疑態度，因為類似斷電行動過去已經出現過幾次，電騙集團往往透過柴油發電機，甚至依靠馬斯克「星鏈」（Starlink）衛星網絡照常運作。

唔單止係咁，近日網上瘋傳影片，顯示位於妙瓦底「亞太城集團」竟喺春節假期舉辦2025年春節聯歡晚會，現場掛滿中文春聯，主持人用中文同緬語輪流致辭，喊出「再創輝煌」口號，場面囂張。當晚放煙花，舞龍舞獅，仲有著旗袍長腿少女上台勁跳「APT」嗰首「洗腦歌」，鑼鼓喧天，非常熱鬧。

「亞太城」座落喺妙瓦底水溝谷，離泰國邊境唔遠，好多受騙者都係由泰國被騙帶到此處。據了解，呢類慶功會多半係電騙集團一種心理戰術，旨在安撫內部人心同製造「營運如常」假象，吸引更多同類集團進駐，亦削弱外界對執法行動決心。

泰國總理佩通坦5號展開4日訪華行程，今次重點之一就係要向中方表態：泰國政府會加大力度打擊電信詐騙集團。中國國家主席習近平在會面時強調，中方讚賞泰方就打擊網絡賭博及電騙採取嘅有力措施，雙方要繼續加強執法安全同司法合作，共同維護人民生命財產安全同地區秩序。

佩通坦回應，泰方願意同中國及其他鄰國一齊加強執法合作，採取堅決有效手段，打擊網賭電騙等跨境犯罪。習近平對泰方嚴打電騙政策大表讚賞，而佩通坦表示會繼續落力配合，務求最大限度切斷跨境詐騙集團運作。《I》